شاهد عيان جنجويد

⭕ رواية الجنجويد

بقلم طارق اللبيب..

الحلقة 1

مقدمة للقصة.

القصة دي بحكي فيها واحد اسمه (ضو البيت) ..

بغض النظر عن اختلافنا معاهو. بس هو زول صادق.. وحكى كل شي شافو.. بكل شفافيه..

اها قال .....

ياجماعة انا اصلا مواطن من غرب السودان.. شاب الان عمري ٣٢ سنة.. اتخرجت من جامعة في الخرطوم ..ورجعت بلدي ..في شرق دارفور ..

ماعندي علاقة بالسياسه والحكومة.. وشغال في محل بتاع حدادة.. في طرف الحلة .. اها يا زول.. عندي صاحبي. وصديق عمري. من قوات الدعم السريع.. اسمه عيسى عبد المولى .. نحن في الحلة مسمنو الدعامي. لانو هو أول زول من الحلة يلتحق بقوات الدعم السريع ..

اها الزول ده يوم جا اجازة.. الكلام ده كان قبل الحرب بتلاتة اربعة شهور بداية ٢٠٢٣ .. لاقيتو وقعدنا نتونس ..قال لي اسمع ياضو البيت.. نحن ح نمسك السودان..

قلت ليهو كيف يعني؟

قال لي ح تقوم حرب.. ونحن دايرين نشيل جيش الجلابة برة..

ونبقى نحن جيش السودان.. وحميدتي ح يكون رئيس السودان .. واهلنا ديل كلهم نسوقهم يسكنو عمارات الجلابة الفي الخرطوم.. قلت ليهو انت بتحلم ولا شنو؟؟

دعامة شنو كمان البقدرو على الجيش؟؟ ..

قال لي يازول مافي جيش ولاشي .. الناس ديل قاعدين نحارب ليهم نحن.. ماعندهم شي.. نحن هسي حارسين المطار ..وحارسين البنوك وحارسين الاذاعة والقصر الجمهوري نحن يازول حكومة.. مأمنين البلد . الناس ديل ملكية ساي .. حرب دي مابعرفولا ..والدواس ده مابقدرو عليه

قلت ليهو والله ياعيسى ياخوي. كلامك ده ما دخل في راسي ..

قال لي.. اصبر تحيا وتشوف ..

طيب ارجع بيكم ورا شوية .. احكي ليكم عن الجنجويد ..

منذ عقود من السنين.. كان في غرب السودان نشاط من مجموعات متفلته.. تنشط في سرقة الجمال والابقار وغيرها من السعيه .. وبقطعو الطريق بالسلاح .. وعايشين حياتهم على النهب المسلح .. وكان هذا من زمان امكن من زمن الانجليز واحتمال قبله .. العصابات دي مشهور بعصابات (الجنجويد) في غرب السودان وشرق الدول الحدودية معه.

للعلم . الجنجويد كلمة معناها (جن راكب جواد شايل جيم ٣)

وكانت المجموعات دي عبارة عن نهابه وقطاع طرق.. زي الهمباتة بالضبط .. الهمباتة بركبو الإبل ويستخدمو السيوف.. وفي بعض الأحيان البندق او الطبنجة .. زي ماقال الطيب ود ضحوية ..

ديكة حلة. من الطلة. مابحوشونا.

يابت غني.. ياناس روقو.. ماتدوشونا.

حرمت الحلال.. الليلة كان يغشونا.

حس الفي الجراب.. هسع يعيط في الشونه....

الفي الجراب ده المسدس طبعا يصدر صوت في الارجاء..

اما الجنجويد

سلحتهم حكومة الاحزاب وكانو في الوقت ده بسموهم المراحيل.بداية تسليحهم .سلحهم الصادق المهدي.. في حكومة الأحزاب ووزير الدفاع كان برمة ناصر.. وهو الاشرف على عملية التسليح .. .

وكان ذلك في منافسه بين الأمة وبين الاتحادي الديمقراطي. (ناس الميرغني). وناس الميرغني.. طبعا سلحو القبائل (غير) العربية.. وناس الصادق وبرمة ناصر سلحو القبائل العربية .. واضح؟

لتقويتهم وجذبهم لصندوق الاقتراع ..دي كان أول أسلحة دخلت للجنجويد

بعد داك لمن جا جون قرنق وحاول يحيط بالسودان.. ويطوقه ..فقام استقطب كل الحركات المسلحة من المكون الافريقي.. للتقارب الاثني والقبلي.

وفي نفس الوقت المؤامرة الغربية كانت حاضرة .امريكا وبريطانيا والنرويج. والص...هاينة ساهموا كلهم في تسليح الحركات التي تحالفت مع جون قرنق.. لتطويق السودان ..وايضا بعض الدول العربية كانت والغة في دعم هذه القوى .. لحدى مادخلت قوات قرنق والحركات المسلحة على شرق السودان لغاية منطقة همشكوريب..

بعداك الحكومة لقت انها مضطرة توظف اي بندقية متاحة ضد هذا الطوفان الجائر المدعوم عالميا..

بمايسمى ب(سرقة المهنة) او حرب الغوريلا (حرب بالوكالة) وهي انك انت مثلا ممكن توظف جماعات محلية..مسلحة أو تسلحها وتسيطر عليها.. عشان تقوم ليك بمهام ..والحاجة دي موجودة حتى في الدول العظمى .. زي البلاك ووتر في امريكا. والتي سميت لاحقا ب (اكاديمي).. وزي فاغنر الروسية .. حتى القانون الأمريكي أجاز تكوين شركات مهامها الخدمات العسكرية..

والان حتى الإمارات أصبحت تستخدم المليشيات بمقابل المال لتنفيذ مهام ضد خصومها ..

في يوم من ذات الايام والكلام ده كان في التسعينات.. كان هنالك تاجر اسمه (محمد حمدان (د ق ل و) .تاجر مواشي .. عندو ماشية اتنهبت بالنهب المسلح .. فزعل زعل شديد.. وكون عصابة زيو وزي الحرامية التانين.. لكن ما كان قصدو السرقة والنهب ..بس قال عشان يقدر يحمي تجارته .. لكن بعد داك كان ح ينهب ولالا؟

ده الح نتكلم عنه لاحقا..

محمدحمدان ده رزيقي. وعلى اساس انو تاجر كون عصابة كبيرة.... وسلحهم سلاح جيد واستوعب اخوانه

وبني عمومته في المجموعة وهم من الرزيقات الماهرية

.وبدأت المجموعة تتوسع

... والاولوية اولا للاسرة.. ثم خشم الييت.

. ثم القبيلة..

.والراجل تجارتو اتوسعت واشتغل في المناجم وطلع من أرض السودان دهب لايحصى ولايعد

. وكان له ابن عم من خشم بيت المحاميد اسمه موسى هلال.. بينهما منافسة وحساسيات خالدة على مر الدهور..

بس موسى كان شيخ وزعيم قبيلة.. وكان زعيم الجنجويد الاول. وحرس حدود لكن رجل محضر خير في الصلح والإصلاح وكدا..

عندو قوات لايستهان بها ..

المهم أصبحت عصابة محمد حمدان من اقوى العصابات الجنجويدية في المنطقة..

وسببت رعب لبقية العصابات لكثرتها واستفاد من جودة التسليح الكان جاي من الحكومة اصلا .. وتطورت وسائل نقل الجنود من الجواد إلى اللاندكروزر

وبدأت بعض المجموعات من العصابات الاخرى تنضم إلى دقلو .. لاعتبارات كثيرة منها انه غني يدفع المال لجنوده بسخاء .. ومجموعته كبيرة.. وتسليحها وعرباتها وكدا يعني..

فالمغريات كانت عنده اكبر من غيره .. بقت المجموعة كبيرة ..

وتوسعت وبدأت تغير على بعض القبائل غير العربية.. باعتبارها حواضن للعدو التقليدي.. فاحرقت القرى ودمرت البلاد وهجرت مئات الالاف من سكان دارفور اهل الدين والصلاح .. نتيجة هذا العداء الازلي بين المكون العربي والمكون الافريقي ..

غارات الجنجويد دائما بتكون على القبائل غير العربيه زي ما حكينا .

قتل ونهب وسرقه واستحقار وذله وأهانات وتطهير عرقي وحرق قرى باكملها. ويعامل هذه المكونات معامله دونيه..

ولان الحكومة استخدمتهم لطحن الحركات المسلحة .. فاصبحوا لايفرقون بين عسكري ومدني .. يغيرون على القرى التي تعتبر حواضن لهذه الحركات.. بحجه ان بعض جنود الحركات ..يختبئون في هذه القرى.. المهم ان الحكومه غضت الطرف عن جرائمهم.. فتره من الزمن.. ولما رات الحكومه انهم مقاتلون شرسون يستطيعون كسر شوكة هذه الحركات المسلحه.. ولكن تفلتاتهم على المدنيين لاتضبط وخارج نطاق السيطرة..

بدأت الحكومة في عمل في محادثات وتفاهمات مع محمد حمدان دقـ لو ..انه يقننوا ليهو القوات بتاعته دي ..

ويعملوها قوات لحرس الحدود ..طبعا الدول الخارجيه كانت بتتكلم عن الابادات الجماعيه اللي يقوم بها الجنجويد ضد المكونات الافريقيه.. مثل الزغاوه والمساليت والقرعان وغيرهم.. والادانات والمحكمة الدولية .. ومساحات..

فلما مسك محمد حمدان الحدود.. ومنع الهجره غير الشرعيه.. من الدول الافريقيه عبر السودان ..الى الدول الأوربية.

رضيت عنه القوى الغربيه التي كانت تجرمه لارتكابه جرائم الحرب.. وسكتت اصوات الادانات .

ودي كانت النواه الاولى للقوة المنظمة مرت بأربعة مراحل .. الاولى قوات المراحيل الحاربت جون قرنق في الجنوب

وجنوب دارفور والنيل الازرق وحتى شرق السودان.

ثم مرحلة الجنجويد.. ثم حرس الحدود

ثم منها تولدت قوات مايسمى بالدعم السريع..

وصارت قوة منظمه.. وعندها ضوابط وقوانين وعندها رتب(اعتبارية) وزي رسمي مكتوب عليه الدعم السريع ..

وعنده لون مميز.. والاوضاع يعني اتغيرت.. والحكومة عملت ليها قانون عديل.. .وهم عملو تغيير شديد جدا في سلوكيات ومبادى القوات .. وبطلوا الغارات ال بغيروها على القرى والحلال الا نادرا وبقى تاجر المواشي ضابط كبير .. منضبط ورجل يتبع للدولة بالقانون ..بس بقى بحارب الحركات المسلحه .. وحليف قوي للحكومة المركزية .. وبقى الزراع الايمن ليها.. فشكلت قوات الدعم السريع دعما لايستهان به للجيش وللقوات المسلحه..

واصبحت هي سلاح المشاهد الفعلي للدوله.. لدرجه ان الدوله اهملت تدريب المشاه في القوات المسلحه.. سنوات عديده.. وهذه ستكون الكارثه التي تفتك بالبلاد لاحقا فتابعوا معي رحمكم الله..

إلى اللقاء

⭕ رواية الجنجويد

بقلم طارق اللبيب

الحلقة ٢

الحصل قبل الحرب بيومين تلاته شفت في التلفزيون الناطق الرسمي باسم الجيش .. قال انو قوات الدعم السريع انتشرت في العاصمة انتشارات غير قانونية .. وبدون تنسيق مع الجهات الرسمية .. وهاجمت قاعدة مروي .. وقال نحن بنحذر لانو دي بوادر حرب .. ستقضي على الاخضر واليابس .. فانا من هنا اتذكرت الكلام القالو لي عيسى ..وعرفت انو الدعامة بدو في تنفيذ الخطة.. ودي والله الحقيقية الاولى اصلكم ماتنسوها .. قيادة الدعم السريع اصلا ناوية على الحرب واستلام البلد من زمن ..

ولقت التحفيز من بعض الاطراف الناقمة على الجيش .. وراس الحية فولكر .. وسبب الانفجار . اتفاق اسمه الاتفاق الاطاري ..

ود من الخاجات العملت لي لي ربكة . لمن سمعت حميدتي قال الناس ديل هاجمونا .. ونحن بندافع عن نفسنا ..وهو نفسه في بداية الحرب في القنوات قال .. نحن سبطرنا على البلد ومحاصرين البرهان .. وما ح نخليه يا اما يستسلم .. او نستلمو ..

في حاجة ما مظبوطة في الموضوع صاح؟.

وفي مفارقات عجيبة في الحرب دي ح احكيها ليكم .. لانو انت لمن تكون دعامي وشايف البحصل بعيونك.. مازي انك تكون مواطن بعيد و متابع الميديا مابتكون عارف الحقايق ..

اها المهم ..

اتصل علي عيسى عبد المولى. بعد بداية الحرب باسبوعين .. عيسى برضو رزيقي من ناحية ابوه امه . غريبة .. وكان رتبته نقيب . قال لي اسمع يا الحبيب.. زي ما حكيت ليك ..نحن يا صحبي كدا .. استلمنا السودان طقيق ..زي ما حكيت ليك قبل كدا .. اركب تعال ..ما تتردد.. نحن سيطرنا على الخرطوم وبحري وامدرمان .. والدعم السريع الان في كل شارع .في كل مكان .. واحتلينا البيوت والعمارات السمحة .. كسرنا البنوك وغنمنا القروش الفيها كلها خليناها بلاط ..والاسواق .. ومحلات الدهب .. والله الدهب والدولار لمن بطنا طمت منه.. بقينا نشتت القروش للشماشة الفي الشارع ..تعال ..

والله تغنا لي جنا جناك ..

قلت ليهو طيب ده موش ده حق ناس وحرام؟؟ .. قال لي لالا .. دي أموال الجلابة والفلول .. حقهم حلال دي غنايمنا ..

يازول تعال ماتضيع الفرصة .. بعدين تجي تندم وتتبكى ..

نحن اقسم بالله ..نهبنا السودان بيت بيت .. كافوري دي مسكناها بالصف .. والمنشية والرياض والطائف.. والله جنس نعم .. اللهم زد وبارك بس.

والجلابة والفلول يا الضو .خلو بيوتهم وهربو .. خافو من البندق .. ونحن شلنا عمار بيوتم القروش والدهب والموبايلات والشاشات المعلقة في الحيط ماخلينا شي ..اولاد المره.

المهم الزول ده اغراني والشي العرفتو انو في ناس كثيرين من الحلة الأنا فيها ..

رسلو ليهم زي حالتي .. إخوانهم وأولاد اعمامهم واصحابهم قالو ليهم تعالو شيلو الغنايم ..

حقيقة انا كلام عيسى اغراني شديد .. وقعدت افكر يوميا ..وصراحة متردد.. اكتر من شهر .لكن في اكتر من خمسطاشر شاب من حلتنا سافرو.. وبعضهم جو راجعين جابو عربات ورجعو ..

والبنات بقن يجن مارات فوقي .. وانا شغال في الورشة.. يقولن لي .. مالك يا ضو البيت قاعد في الحلة مع الحريم؟؟ ماك عارف الرجال مشو الدواس؟ .. ماسمعت بالرجال الغابت وجابت؟؟ الحكاية اتلمت علي من جهتين.. جيهة العيب . والاغراء والمال الفي الخرطوم ..والناس كلها في البلد بتكلمو انو أولادنا مسكو السودان .. واحتلو الخرطوم وغنمو وركبو العربات ...و الخرطوم بقت أمنية شباب الحلة انا البقعدني شنو ؟..

يازول مشيت كلمت ابوي وامي وقلت ليهم انا لاحق اخواني في الخرطوم .. ابوي قال لي امشي.. يازول ياهو مصير الرجال .. اضربوا الجلابة ديل حميدتي قال ديل كفار ماتخلو فيهم زول .. وانا طبعا عارف انو نحن ناس مهمشين والحكومات ما مهتمه بينا .. وجوانا حقد وغل ماطبيعي على النخب النيلية .. وجوانا احساس بانهم بنظرو لينا نظرة دونيه.. فكل الأسباب دي خلت عندي دافع قوي افكر اركب امشي الخرطوم.. اتواصلت مع عيسى..

قلت ليهو يلا ياعيسى.. انا نويت الجية.. وصف لي محلك انت وين ؟؟

قعد يضحك قال لي يازول الحكاية ما كدا .. في قادة وفي توزيع وتدريب وتسليح.. وبوزعوك في الحتة البشوفوها احتمال ماتلاقيني ذاتو . القصة دي مافي يدي يا الضو .. لكن بس خليك معاي على تواصل اتصل علي وريني الحتة البوزعوك فيها انا بصلك في مكانك..

اها يازول لملمت اطرافي وشلت هديماتي في شنطة هانباك ومشيت على السوق اسأل .. قالو في عربات بتشيل الشباب توديهم الخرطوم.. في الميدان الورا المدرسة .. اها مشيت لقيت ليك اكتر من خمسة زد وآيات .. وزد اس .. المهم شاحنات كبيرة .. وفي كم تاتشر كدا واقفة . وفي ضباط من الدعم السريع واقفين بركبو في الشباب ..

انا لمن جيت لم فيني ضابط .. وكت شافني قال لي اها يازول رامي قدام؟؟ .. قلت ليهو قدام .. قال لي امشي هناك للقائد داك سجل اسمك وبياناتك وتعال ..

مشيت سجلت اسمي واديتو بياناتي وسلمني ورقة.. قال لي طبقها خليها معاك ماتضيع منك .

المهم رجعت للضابط وريتو الورقة .. قال لي الرقم الفي الورقة ده تحفظه زي اسمك ..

الشي اللاحظتو انو في شباب بجو بي عربات من مناطق بعيدة ..وبسجلو معانا مجموعات مجموعات .. بس من لهجتهم ناس اغراب.. أشكالهم شينة .. ومتسخين.. وشعورهم منكوشة.. احتمال يكونو من برة السودان .. في الوكت ده ما ركزت مع الموضوع كتير ..لكن تاني عرفتا انهم جايين فزع من تشاد والنيجر . من اهلنا العرب

ركبنا والناس دي متحفزة ومعنوياتها عالية..

كل ما جرار يتملي بالناس بتحرك وبتجمعو كلهم ..

في وادي يبعد ١٣ كيلو من المدينه ..

وفي كم تاتشر ماشين مع الطوف المتحرك ..وفيها الاكل والزوادات وكدا ..كمية من الاكل الجاهز.. جاي من دولة خليجية معروفة . انا اول مرة اضوقو ..

لمن اتحركنا ده كان الواطه عصر..

اتجمعنا قبل الوادي أمكن حكاية بتاعة ٨ شاحنات ..

و٤ عربات قتالية مجهزة .. والله الناس ديل جادين في الموضوع بطريقة تحير ..

وقفنا والبصلي صلى والغاليية ماعندهم علاقة بالصلاة واتحركنا .. بعد قسمنا نص الليل مشي .. طفو الانوار كلها وبقو ماشين بضو القمر ..

وقفنا ووزعو لينا اكل واتحركنا ..

انا جواي في خوف من المجهول زول ماشي لحرب لكن بتطارش .. وبنشغل كل ما افكر ..

المهم الرحلة كانت طويلة وبي طرق عجيبة وغريبة .. بتلاقينا عربات جديدة بكاسي ولاندكروزرات..وشاحنة حاجات شي شاشات وشي تلاجات .. جاية من الخرطوم ماشة على دارفور .. والشباب بتكلمو.. قالو ديل العيال الغنمت ورجعت..

وقالو بعد ما يودو المنهوبات بخلو العربات دي هناك تاني برجعو .. الناس دي اتحفزت والحماس في السما .. انا طبعا جواي ما مطمن لقصة النهب دي .. لكن يازول موت الجماعة عرس ...موش قالو فلول؟ .. يلا فلول فلول ..

في النهاية وصلنا شارع اسفلتي فااااضي من اسم عربية...

قالو دي جبرة الشيخ في النهاية دخلنا امدرمان زي الساعة ٤ صباح تالت يوم ..

وقفونا في فسحة كبيرة في منطقة اسمها العامريه .. وزعوا الناس وكان في كمية من التاتشرات واقفات بندهو الناس يملو التاتشر

ويتحركو

انا ومعاي قريب ال٢٥٠ نفر مانزلونا دورو الشاحنات. ومشينا صالحة في الشارع مافي اي شى غير الدعامة.. مالين الشوارع ومرتكزين في التقاطعات.. والاسطوبات .. كمية ما كنت بتخيلا.. وصلنا صالحة لقيت في صالحة أمة لا اله الا الله.. من الدعامة زي النمل.. وهناك شايف في شلة متحلقين وماسكين يدين بعض.. بغنو وبضربو في الارض باقدامهم .. شان ام قرون بركب الحديد بوكسي ..وانا اندمجت في البشرية دي

واستشعرت الوضع ..

باختصار انا بين يوم وليلة بقيت دعامي ولفيت كدمول اغبش حاجة ما كنت بتصورها في حياتي.

المهم تابعو معاي واسمعو قصتي الواقعية

قصة لا تحدث الا في الافلام..

إلى اللقاء..

رواية الجنجويد

بقلم طارق اللبيب

الحلقة ٣

كملنا اليوم داك كله في صالحة

واكل تمام وشراب تمام وعصير اشكال والوان وضبايح وشغل على مستوى .

والناس شغالين تفويج وتوزيع .. مشينا اتدربنا على السلاح الخفيف.. قالو بقية الأسلحة تتعلمها في الميدان ..مافي وقت اتحركو سلموني بطاقتي ولبس وسلاح .. وركبت مع زملاي في عربية قتالية.. ومشينا بحري.. بطريق كوبري شمبات ..ومن هناك على شرق النيل .ارتكاز حلة كوكو ..

نزلنا في عمارة في الحلة ساكنين قبلينا افراد وضباط أمكن قريب ال٣٠ في العمارة دي مجهزة بكل العفش والمكيفات والتلاجات والاكل راقد زي الهم .. ما محتاجين لأي حاجة ..

العمارات الحولنا دي ٩٠ في المية منها .

ساكنينها الدعم السريع .. أهلها سافرو طردوهم منها بالسلاح .. لحاجة اسمها امر بالاخلاء.

اها يازول تاني يوم بعد وصلت اتصلت على عيسى عبدالمولي. قلت ليهو انا في حلة كوكو

قال انا بعيد في جنوب الخرطوم . كدي للكلاكلة

طبعا بصراحة لقيت العاصمة اتغيرت.. وبقت كئيبة.. الأسواق منهوبة. ومكسرة ومحروقه..

والشوارع مليانه.. عربات مقلبة ومشلعة

ومافي مواطنين نهائي ..بس عساكر الدعم السريع ..في كل مكان .. المواطنين الموجودين

قلة قليلة ستات الشاي .. وطبليات سجاير

وبتاعين الكوارو .. والدرداقات.. وكلهم مندمجين

مع الاشاوس .. وعلاقاتهم طيبة وامورهم واضحة .. ستات الشاي ديل جزء منهن جاهزية عديل.. والواحدة ممكن تلقى عندها نمرة عسكرية ..

وانجح استخبارات للجاهزيه..

الاشكال الخايمة مختلفة ناس راكبين مواتر.. وناس ركشات .. وعربات المواطنين .. ناس في الشوارع .. وناس مع ستات الشاي . وناس تحت الشجر .. والضلله .. ممكن جدا تلقى هادمين باب الدكان.. ومدخلين التاتشر متوجه الى الخارج.. في الوضعية الهجومية .. ودي كتيرة .. المهم الجاهزية في كل مكان. لو رفعت ليك طوبة بتلقى تحتها دعامي ..

والشي العجيب مافي ولا عسكري جيش .. انا استغربت الجيش السوداني مشى وين؟.. خلا الناس ديل ماخدين راحتهم بالطريقة دي؟؟

والله حاجة عجيبة.. ده سؤالي الأول ح اجاوبكم عليهو بكل شفافية وصدق لقدام ..

في ناس لسع في المواطنين ماطلعو والبجي طالع بنوقفو في الارتكاز وفتاشة شديدة ..

التعليمات انو لو لقيتو زول عنده علاقة بالجيش او الاستخبارات تستلمو طوالي ..

ولو قبضت ليك عسكري او فرد استخبارات تابع للجيش .. القايد بديك حافز كبير .. عشان كدا بتشوفو كتير .. انو نحن بنصر اصرار شديد على نزع الاعتراف من المواطن .. عشان يقول انا جيش او استخبارات ..بنجلد الواحد لمن يقوا انا استخبارات او تابع للجيش ..حتى لو ماحقيقة .. المهم يقول .. تمشي تقول انا مواطن.. تتبلا لمن تعرف حاجة .. تقول استخبارات او جيش مابندقك ..طوالي بنسوقك نوديك للقائد يعتقلك ونحن نستلم المكافأة والحافز..

وحتى المتعاونين معانا البحدد ليهو بيت عسكري

او استخبارات بدفعو ليهو .. حتى لو زول تابع للبوليس بس تجيب المعلومة تاخد قروش .. إن شاء الله زول بالمعاش ..

وفي الارتكاز مافي نهب شديد .. الا دهب او قروش او موبايل غالي ..

انت فلولي كمان تجي شايل حاجات زي دي ونخليك تمشي ؟؟ ماتحلم بيها ..

١ جا واحد من الحلة مواطن قعد معانا وفطر يتونس ويضحك شكلو الشباب بعرفوه ..

بعد الفطور قال ليهم..اسمعو يا جاهزيه ..في بيت ما اتهبش. شدرو شايل ... البيت حق واحد فلولي من القطط السمان ..شغال في جياد.. مدير شنو كدا ماعارف .. الجماعة قالو لي قوم يا ضو البيت معانا ..انت جاي يادوب ماغنمت شي ..

قمنا مشينا البيت مابعيد من حلة كوكو .. في البيوت العلي يمينك وانت طالع على ١٣ ..

والزول المواطن المتعاون ده راكب معانا ..في التاتشر ..لمن وصلنا البيت ادوهو قروش زي خمسين ألف وقالو ليهو اتخارج ..

نحن بنكسر في الباب ..هو مشى قعد في ضل شجرة هناك .. قلت ليهم الزول الكلب ده قعد هنا لشنو؟؟ .. قالو لي لمن نتخارج نحن.. هو بخش يشفشف الباقي ..

الحلة فاضية من اسم بشر.. والله ماتسمع الا صوت القمري ..دخلنا جوه البيت فتاشة شديدة .. قلبنا الحاجات ماخلينا شي البلقى ليهو حاجة غالية يكورك.. زي ناس الدهب وكت يلقو ليهم خليه ..

واحد بفتش في الدولاب.. واحد بحفر في الأركان

وبهبشو المراتب ولو شكو بشرطوها بالسكين يشوفو جواها شنو .. ويقلبو الكراسي .. وممكن يفرتكوها .. قطنه قطنه ..وانا طبعا ماقادر اعمل حاجة زيهم ..بس بعاين.. لسع ما اتعودت علي الشفشفه..بعاين ومستغرب ..

الزول سيد البيت شكلو لمن طلع. ماخلا قروش ولا دهب .. لقو لابتوبات وشاشتين وطابعة المهم كم حاجة كدا .. حاجات غالية وخفيفة .. اتوزعوها.. وقايد المجموعة شال نصيب الأسد.

اها لامن طلعنا ..لقينا الزول الوصف لينا البيت.. لسع قاعد.. ومعاهو حريم تلاتة أربعة حريم كدا.. وواحد بتاع كارو جو متين؟ وعرفو كيف؟.. حاجة تحير ..

طبعا ديل بخشو البيت ده بلحسو الباقي مابخلو حاجة بعد ما نحن نطلع ..

انا طبعا ساكت ..ما اتكلمت لاخير ولاشر. الناس المعاي ديل لسع ما اتعرفت عليهم كويس ..بس في واحد اسمه محسن ده كان معاي لمن جينا من السفر لكن اندمج اسرع مني .. شفشف سعران سعر جد .. مفلفل شعرو وما بستحمى نهاي من الصباح بقوم يكشح ليهو موية في وشو لا سواك ولا صلاة. لاوضو ولاحمام..

في واحد اعور كدا اسمو كاسترو .. بس اسمو الحقيقي مابعرفو

.شكلو قديم مع الجاهزية لكن ماعندو رتبة لانو من السلامات .. والسلامات محقورين في الدعم السريع .. مكروهين من الرزيقات والمسيربة ..

وبينهم وبين البني هلبه عداء ازلي .. الدعم السريع بقيف مع البني هلبة ضد السلامات .. وفي مشاكل كتيرة في الحتة دي ..المهم السلامي ده معانا في العربية زول طيبان كدا تحس بيهو ..قال لي يا ضو البيت انت مالقيت حاجة؟ قلت ليهو لااا ماشلت حاجة ..قال اصبر لمن نرجع عندي ايفون ١٣ بكرتونتو.. بديك ليهو .. اصلا ما حيجيب قروش في البلد دي ..

وفعلا لمن وصلنا اداني التلفون الايفون الماخمج.

ونشات بيني وبينو علاقة طيبة ..

العمارة النحن ساكنين فيها فيها اتنين قناصة

في الغرف الاتنين في الكورنا الشرقي والكورنا الغربي

يعني الاتنين كاشفين أربعة شوارع ..

والعمارات الجبنا كلها فيها قناصه ماقاعدين يطلعو نهائي .. حتى مابجو ياكلو معانا .. بودو ليهم الاكل فوق .. وعندهم بلح وموبة وبسكويت وجبنة مثلثات .. وبعض الماكولات الجاهزة ..عشان مايتحركو من مكانهم ..حتى لمن نطلع فزع او هجوم هم مابطلعو معانا ممنوعين يغادرو اماكنهم ..

قايد المنطقة دي اسمو يعقوب الشين.

ده قايد المنطقه كلها ..وكل مجموعة عندها قايد..

بس اللاحظتو قواد المناطق الكبيرة لازم يكونو مننا .. من قبيلتنا .. الامرات في مجموعات براها عندها قايد منهم .. وديل بعدين شكلو لينا مشكلة كبيرة بحكيها ليكم

انا هسي لغاية الآن ماشفت حرب واشتباك.. بس شفشفه .. ومطاردة للمواطنين الفلول.. طبعا لمن تسمع كلمة الفلول معناها المواطنين ..

٢ يوم بالليل القايد جمعنا في سطوح العمارة وقال بكرة عندنا هجوم .. هاجمين على جيش الفلول جيش برهان الكحيان .. وح تكون في غنايم بالكميات .. قال لينا المعسكر الدايرين نهجم عليهو فيهو كمية من الدولارات الداسنها ناس علي كرتي .. وده من حقنا .. نحن المهمشين ..فاهمين.. دايرين قتال بشراسة ..لازم ننتصر ونستلم المعسكر ..ونشيل المال المكدس جوه .. واسمعوني اقسم بالله البعرد فيكم (البهرب).. طلقة في نص راسه ما بخسر فيهو طلقتين.. كلهم قالو الله اكبر .. جاهزية سرعة حسم.. بعد الاجتماع ده.. الناس دي فرحت.. انا صراحة .. مسكتني خوفه ..اول مرة اخش في حرب حقيقة .. ومواجهة مباشرة ..وموت ودم وقتل .. ياجماعة هسي انا جاي وتفكيري كله عربية ودهب ودولارات.. هسي الجاب الهجوم على الجيش شنو؟؟

الجيش مخليكم في حالكم خلوه في حالو..ده انا بقيت بكلم نفسي طبعا ..

الناس دي متحفزين من بالليل بنضفو في كلاشاتهم وبحهزو للمعركة .. بالليل داك جانا قايد.. معاهو اتنين ن استخبارات الدعم السريع جايين من الرياض شارع الستين .. راكبين اوباما .. شايل معاهو كرتونين.. قاليهو جبت ليك الأمانة ..

الكرتونة دي فيها حبوب كمية .. وحاجات كدا تشبه الشب..

انا سالت كاسترو.. قلت ليهو ده شنو .. قال دي الخرشة لمن تبلع منها وتخش الدواس بتشوف الفلول ديل زي الغنم .. قلت ليهو دي بتجي من وين المخدرات دي ؟؟

قال من الدول المحركة الحرب .. اسكت ساي انا بحكي ليك اسرار .. بس خليك عامل نايم .. قلت ليهو طيب ياكاسترو ..المعسكر ده وين الماشين هاجمنو ده؟؟

قال مافي زول عارف.. القايد مابوري الا ناس معينين عشان ما تتسرب معلومة .. بخافو من الكمين .. بس بكره نحن طالعين بنعرف في الطريق ونحن ماشين .. اهم حاجة الهجوم المباغت..

الله لايجيبك يايوم بكرة.. انا عندي احساس.. اني ح اموت في الهجوم ده.. الفلول ديل يقتلوني وخلاص..

إلى اللقاء..

رواية الجنجويد

بقلم طارق اللبيب

الحلقة ٤

أصبحنا بي الله .. ومارقين الليلة علي الفلول ..جيش الكيزان هه ..الليلة يوم الطقع النضيف. دي أحاديث مسموعة وغير مسموعة تتبلور هنا وهناك .. حاسي بي حركة ماطبيعية.. لمن ركزت.. لقيت الجماعة بوزعو في حبوب..

وفي ناس مشو.. اول حاجة لفو سجارة بنقو وفي ناس ايس ..

والله ياجماعة حكاية موجعة والله انا طبعا مستحيل استعمل حاجة زي دي .. والنصيحة في ناس تاني مابتناولو المخدرات

بس الغالبية بسطلو وبخرشو .. والصعوط ده نادر عندهم جدا .. نادرا مايلاقيك دعامي بسف .. الحبوب دي حبوب حمرا كدا تشبه حبوب المسكن .. وفي ناس عندهم في شنطهم .. المهم الناس ديل لمن بلعو وشمو وكدا .. اتغيرو تب واتعفرتو .. وبقو ينططو زي القرود ..

والله شباب يحرق القلب .. مستخدم أداة في يد السياسين .. ومافي زول عندو اهتمام بيك تموت تحرق الناس ديل قلوبهم متحجرة حرفيا ..

نحن عندنا في حلة كوكو محور السوق زي ١٥ عربية قتالية موزعة اتجمعت وجاتنا زي عشرين من شرق النيل جيهة ١٣ وحي النصر والمستشفى شرق النيل والجريف

المهم كمية من التاتشرات ومجهزة بكل الأسلحة والناس معنوياته فوق يكوركو..

انا طبعا لسع ما مستوعب.. انا الوحيد الخايف في الوقت ده .. الناس دي كلها ساطلة ومغيبة ..

ومامستشعرين الخطر....

والله تشوفهم تقول ماشين مباراة كورة قدم

ماحاسين باي خوف .. اتذكرت كلام كاسترو معاي البارح بالليل ..قالي لمن تبلع الحبة دي .. بتشوف الفلول ديل زي الغنم ..

المهم يازول اتلملمنا.. ومشينا بشارع القنطرة ..وهنا لاقتنا كمية من العربات كانو متواصلين مع القادة .. جايين من جيهة كافوري والعزبة والحتات دي ..

ولمن وصلنا قصاد مسجد النور في كافوري

تاني اتجمعت معانا كمية ..

والناس دي اتحركت وفي ناس ماشين معانا بمواتر والأسلحة جديدة والزخاير راقدة ..

والناس دي متحفزة ومعنوياتهم عالية ..

انا راكب في التاتشر ورا مع الباب ..

اها العربات وقفت قبل الكوبري .. في عربات أتقدمت قدامنا وفي عربات اتأخرت ورانا ..

قلت للراكب جنبي ده ده شنو؟ .. بعملو في شنو الناس ديل؟ ..

قال ده هجوم الموجات. الاتقدمو ديل.. الموجة الاولى.. ونحن الفي النص ديل الموجة التانية.. والورانا ديل الموجة الأخيرة.. ديل يعني البجيبو النصر..

قلت ليهو والقدام ديل شنو ؟؟

قال لي الشجعان واخد ليهو ضحكة ..

وصلحها سريع قال لي ديل الفلنقايات.. طبعا ديل منهم مستنفرين من الخرطوم .. ومنهم عساكر الجيش المعتقلين ..ومنهم ناس من القبايل الدونية .. لكن الورانا ديل اغلبيتهم الرزيقات وخاصة الماهرية .. ديل بكونو في الاخر .. وعندهم الموبايلات السمحة ..بصورو بعد الانتصار ..ولو جات هزيمة بنسحبو .. ديل ناس السكن السمح والاكل السمح اغلبيتهم ضباط كبار.. وشغالين في الاستخبارات .. اما البحاربو وبداوسو ديل نحن . المسيريه والبني هلبه والسلامات والحوازمة والقبايل درجة تانية في تراتبية الدعم السريع .. انت

عشان كدا الرزيقات الماهرية نادرا ما يموتو في معركة .. واغلبيتهم ضباط واعلاميين وناس فيديوهات .. اها ناس الموجة الاولى البتكون في وش المدفع ديل ..منهم زي ما ذكرنا بعض المعتقلين من المواطنين ومنسوبي القوات النظامية ..

اصبرو ياجماعة بعدين ح نتكلم عن موضوع المعتقلين ده موضوع شايك وحساس جدا

ومعقد وفيهو قصص يشيب الراس .. لانو كتير من الناس ماعندها إلمام بالبحصل في معتقلات الدعم السريع وماعارفين انو.. في كتير من المعتقلين بموتو في المعارك دي .. لأنهم بيجبروهم على الحرب او يصفوهم..

في قايد اسمو بركة.. اعتقل قريب الالف شاب من الحاج يوسف والجريف شرق والمغاربة وجندهم في الدعم السريع بالاجبار .. وديل أغلبيتهم ماتو في الهجوم على معسكرات الجيش ..

وناس جنوب الحزام والعزبة .. كمية جندوهم بالغصب .. وعلى كيفك ياتشيل سلاح مع الجاهزية يا اما طلقة في رأسك ..

دي أسهل حاجة..

طيب ياجماعة ارح نحن شكلنا هاجمين القيادة العامة.. عرفنا كدا في النهاية .. اها الوقت داك كان البرهان جوة القيادة..

ومعاهو كبار الضباط ..ناس القيادة والسيطرة ..وإدارة العمليات..

قالو ديل جوة داسين دولارات ودهب كمية مبالغ فيها .. حقة. الكيزان والقطط السمان ..

يلا في زي تلاتين عربية قطعت الكوبري .(كوبري كوبر). وفي عربات واقفة في نص الكوبري .. دي الفيها انا .. والرزيقات الملوك واقفين اخر ناس .. في بداية الكوبري من ناحية السجن .. قادة وناس سمحين كدا وبيض ونضيفين عرفتهم انا طبعا ديل ياهم ناس التصوير والفيديوهات

ماناس دواس نهائي .. الا يقعو في كمين او يحصل عليهم هجوم من الجيش .. المقاوم يقاوم والبعرد يعرد..

وزي ما حكيت ليك هم بكونو في آخر المتحرك لمن تكتم بنسحبو .. لكن ناس الموجة الاولى والتانية البنسحب .. ديل بصفوهو طوالي بدون اي كلام عشان كدا انت مجبور تداوس لمن تنتصر او تموت

انا حقيقة اتمنيت اكون في الاخر .. لكن وزعوني في النص غايتو ربنا يستر ..

العربات الاتقدمت دي مننا مسافة كيلو او اتنين كيلو .. نحن شغالين تدوين داخل القياده وهم هجموا هجوم اقتحام.. ونحن بس سامعين صوت الزخيرة .. طق تاح طرررر كو طاخ والله اصوات تجيب الفزع في القلب

اظن الذخيرة دي مدورة قريب النص ساعة..

ونحن لسع ماعارفين الموقف عامل كيف .. بعد تقريبا ٤٥ دقيقة صوت الأخيرة قلا شديد

بقيت تسمع طق طرق طرررر ..بعد مسافة ومتباعدة طوالي جات اشرف من جيهة الخرطوم قال اتقدمو .. عرباتتا اتحركت ومشينا الخرطوم

لقينا ناسنا مجدعين والله مشهد يقطع القلب العربات محروقة والناس مقطعة والوضع صعب شديد اول ماسمعنا الكوبري فتحنا نار مكثفة ونحن ماشين مختفين على الناحية الغربية ..

وعربات الموجة الاولى لسع النيران مولعة فيها

ونحن شغالين ضرب داخل القيادة .. انفتحت فينا نار من شتى بقاع الأرض جاية من وين وكيف الله اعلم المهم، ضرب شديد والناس ديل البقع ذاتو مابعاينو ليهو بس ماشين قدام وكانو الرصاص ده مابقتل.. بس هم بموت موت غريب

الرصاص كابي فوقنا زي المطر وهم يتونسون ويضحكو، طبعا مافي انسان مايخاف من الموت لكن حبايبي ديل الطلة مأثرة معاهم .. والله انا خفت عديل..

ياخي الناس بموتو قدامي زي الجراد والله الجيش ده ضربنا ضرب مايهمنا حاجة والقوة اتشتت وفي ناس انسحبو جيهة بري ونحن جرينا بوركينا ساي على جيهة البحر .. ومشينا بطريق مستشفى المعلم عشان نركب الكوبري ..

كنا متوقعين فزع من الموجة التالتة لكن والله زي ماقال صاحبي انسحبو .. وتاني ح يمشو يلملمو ناس مستنفرين ومعتقلين .. ويجيبهم للمحرقة .. ياخ ده وضع كارثى

ياخ نحن قطعنا الكوبري قريب الالف نفر رجعنا ٣٠ ..دي حالة دي ..

بعدين الحاجة العجيبة الجيش ده صد الهجوم .. ونحن ماشفناهو.. اقسم بالله التقول البضربو فينا ديل .. شياطين ما بشر .. ياخي تهاجم ليك ناس

ويضربوك وانت ماشايفهم ..

والله نحن بس شغالين تدوين جوة .. أصابت ولا ما أصابت.. ماعارفين ..

لكن هم والله لقطو الناس ديل لقيط . شغل احترافي ومدروس والله الحق يقال .. انا بقول الحق .. حتى لو كان الحق ده ضدي .. ناسنا ماتو كمية في الهجوم ده .. وانا والله مرقت بقدرة قادر..

زولي القبيل كان بحكي معاي في العربية ونحن ماشين .. الله يرحمه ..انضرب .. دنيا زايلي ..ونعيمه زايل ..

وانا والله مرقت من ضل السيف

انا معاي شباب مضربين ومجرحين قطعنا الكوبري كداري .. وشايفين يلمو فينا ديك يصفون زعلة ساي

ماشين وشايفين اول ماوصلنا اخر الكوبري من ناحية السجن لقيناهم واقفين قادة واعلامينن وبعض ناس الاستخبارات ..

وخليكم متابعين

إلى اللقاء

رواية الجنجويد

الحلقة 5

بقلم طارق اللبيب

من قطعنا الكوبري .. في واحد من الجماعة الماحاربو نزل وقال لينا المصابين كم؟ .. قلنا ليهو تلاته اصابات صعبة و٤ اصابات خفيفة .. رفعونا في التاتشرات ..

والله الناس ديل ماشافوا المعركة بعيونهم .. طبعا نحن خلينا ورانا ناس كمية مصابين.. وفرينا بجلدنا .. وطبعا الجث... ث .. في كل مكان حول القيادة ..

طبعا في النهاية فهمت خطة الهروب البعملوها الاشاوس ونحن عشان جديدين .. ماكنا عارفنها.. وهي كالآتي..

لمن المعركة تكتم فيك .. ماتهرب لورا .. عشان القادة والماهرية بكونو حارسنك ورا .. اول ماتجي معرد بضربوك.. انت تهرب بطرق جانبية يمين او شمال ..

لكن نحن الهبل جيناهم عديل لكن الله مرقنا لمن@ لقونا مصابين .. عرفونا داوسنا..

اها جماعتنا ديل قلنا ليهم في ناس في محل الاشتباك مصابين واصاباتهم خطرة ..

القائد قال بعدين بنرجع نجيبهم .. واحد مننا اسمه عبد الله.. قال ليهو الناس ديل محتاجين إسعاف ياجاهزية .

قال ليه. يازول ماتكتر الكلام ..

البقدر بجي ..والبموت الموت حق .. نحن ما محتاجين لي زول مصاب.. دي حرب نكون او لا نكون .. البنلقاهو تعبان شديد ح يتعبنا.. بنديهو طلقة ..نريحو ونرتاح منه.. ولو في اي عجز في محور من المحاور .. الفزع جاي .. والشباب بسدو الفرقة ..ارح اتحركو ..

جاهزيه فجر وعشية..

انا طبعا وصلوني السكن في الحلة.. ووصلت اول زول من المعركة .. والله تعبان ومرهق وجسمي جت منهار .. ماكنت قايل نفسي بجي .. والله الموت الشفتو الليلة عمري ماشفتو .. ياخ الناس دي مقطعة ومجدعة والله مناظر تخلي الزول يجن.. .

ياخ نحن مشينا المعركة كمية عربات.. أمكن ١٥ عربية .. هسي لغاية الآن ولاعربية ما وصلت .. لانو القوات اشتت داخل بري وامتداد ناصر ..وجزء انسحب على وسط الخرطوم ..على جيهة السوق العربي..

دي خطة الهروب الذكية.. الأنا ماكنت عارفها المهم أسي الساعة ماشة على واحدة ظهر ..

انا خشيت الغرفة ورقدت مامعاي اي زول .. زي الساعة ٣ عصر كدي ..

في عربات رجعت.. جات الحلة فيها كمية من اخوانا مصابين.. ودوهم مستشفى شرق النيل..

وفي ناس رجعو بمواترهم..

في النهاية عرفنا انو أغلبية الناس دي عردت لمن الاشتباكات سخنت .. يمين وشمال .. فهمتا؟؟

نص القوة الكانت في الحلة انتهت والله ..

والله الشباب ماتو بي كميات في المعركة دي ..

حتى كاسترو المسيري . مضروب. لكنها ضربة سلاخية في الفخد اليمين .. وفي واحد اسمه الصادق الدود. بعرفو .. كان معانا برضو ..قالو انجغم .. والله كان زول طيب شديد الوحيد في غرفتنا البصلي .. وعندو سبحة ولابس كمية من الحجابات .. مع انو قالو الحجابات دي السلاح مابياكلا .. والله اغلبية الماتو قدامي لابسين حجابات .. لابسنها حزامات .. موضوع الحجابات ده .. فيهو قصص ونوادر ان شاء الله الزمن يسعفني واحكيها ليكم..

بالمساء كدا مشيت اشوف كاسترو .. لقيتو كويس.. بس مافي زول شغال بيه..

هو ساكن فوق في الطابق الفوقنا طوالي .. قلت ليهو غرفتنا مافيها اي زول.. برجع اجيب اغراضي واجي اقعد .معاك هنا ..

قال لي والله تكون ماقصرت .. بس كلم القايد

بصراحة ياجماعة القايد رجع من المعركة ماتمام .. هو ما مضروب .. بس مزهلل ..

قلت لي كاسترو .. القايد ده مالو عامل كدا ؟؟

قال لي والله ما بعرفو.. مع انو نحن طوالي بنهاجم المعسكرات دي ..وبننضرب دي ما اول مرة ..

عارف يا ضو البيت المرة الفاتت نحن مشينا هاجمنا المدرعات اكتر من ٨٩ عربية.. رجعنا منها ٧ عربات الباقي كله انجغم .

لكن ما بنخليهم الفلول ديل المدرعات والقيادة ديل لازم يسقطو لازم يسقطو..

هسي يومين تلاته تكتمل القوة تاني.. وبنمشي نهاجم ..

قعدت مع كاسترو.. وهو زول حكاي وبتاع محن .. مسيري ..

بقى يحكي لي بانتصارات الاشاوس .. قال يوم نحن كنا في الحاج يوسف ٢٤ .. و٢٤ دي في آخر شارع واحد من الناحية الشمالية ..

قالي جونا اتنين من المواطنين المتعاونين ..

قالو ضرب ليهم قريبهم من السامراب شرق ..

قال في متحرك بتاع الجيش جاي من حطاب

ومعلومة مؤكدة جاي بشارع الهوا اليجي من السامراب مرورا.. بترعة الصرف الصحي وبمشي على المايقوما الترعة..

ومامعروف المتحرك ده ماشي وين ..

ركبنا عربيتنا ومشينا .. نزلنا من العربات كلنا وعملنا كمين في المزارع الفي شارع الهوا.. نحن اخدنا وضعية القنص والعربات بتاعتنا رجعت .. لما المتحرك بتاع الجيش جا .. العساكر بتاعنهم

ما عارفين اي حاجة ..والله كبينا فيهم نار ..

ما انزل الله بها من سلطان ..كملنا نص المتحرك .. عربات بسيطة الهربت وجزء رجع ..

نحن اكتر حاجة نفعونا المتعاونين ديل والله.. ناس زي الكلاب الوفية .. اي تحرك للجيش نحن بنكون عندنا معلومة من المواطنين .. شغالين لينا مخابرات ..والله اكتر من استخبارات الجاهزية ذاتها..

قلت والله ياكاسترو قصة عجيبة ..قصة المواطنين البخونو الجيش ديل .. يدونا معلومة نضرب الجيش ..ويجو في هم الميديا يتبكو زي الحريم .. يقولو الدع.امة هجرونا من بيوتنا ..الدع أمة سرقونا نهبونا.

وين الجيش؟؟ وين الجيش؟؟ ..

وانت جيشك واقف ضدو .. اي حركة يتحركها الجيش . انتو تجيبو المعلومة والجيش ينضرب بي كمين ..

قال لي ياخ ديل بجو يدونا معلومة.. عن عسكري بالمعاش.. ليهو عشرة سنين.. عشان نعتقله ..وهم الواحد يقبض ليهو خمسين ألف..

ديلل والله اوسخ بشر ..

وخلي بالك ديل لو مشو مناطق الجيش.. بشتغلو استخبارات للجيش .. عشان كدا نحن بمجرد ما نكون ماشين من الحتة.. بنصفيهم .. والله نسفرهم بدون رحمة .. ديل وسخ وماعندهم اي امان ..

بس في ناس منهم اصلا ضد الجيش .. بقولو الجيش جيش الكيزان وهم ضد الكيزان عشان كدا واقفين معانا..

ولو داير تعرفهم ظاهرين حتى بتلقاهم في الميديا بس شغالين .. جيش الكيزان جيش الكيزان .. ولمن زول يحاول يقول الدعــ.. أمة عملو وعملو..

يقولو ليهو الدعا.. مة اصلا صناعة الكيزان .. وهسي انقلبوا عليهم ..

عشان كدا النوعية دي ما دايرين الحرب تنتهي ..مع انهم بقولو (لا للحرب) ..

لكن جواهم دايرين الاشاوس يكملو الجيش .. عشان (الدعm الs ريع) يخلي جماعتهم يحكمو ..

لكن اقول ليك حاجة حسب الشي البسمع قوادنا بقولو فيهو..

البلد لابحكمها القحاطة ولا الكيزان .. البلد يحكمها اولاد جنيد بس .. تبقى دولة العطاوة الكبرى بس .. والجلابة والفلول يبقو العبيد والرعاية.. اولاد المراة.

واول مانمسك البلد دي ..ونعلن حكومتنا.. اول ناس بتنتهي منهم.. الزغاوة والمساليت والله مانخلي فيهم نفاخ النار ..

نحن دولتنا لازم تكون أقوى دولة في أفريقيا..

والفلول عارفين الكلام ده .. وبقولو دولة ال دقلو .. نحن (حم...يدتي) . والله عندنا أعظم من الملوك ذاتهم والله الاشاوس ديل بعبدو القايد ده عبادة ..

لو قال ليهم اقعو في النار يقعو .. بعدين مالو لو دولة العطاوة عملناها مملكة

حيكون القايد .. ملك العطاوة وعبدالرحيم اب كيعان ح يكون ولي العهد ..

ماعندنا اي مانع ..

مع انو انتو الرزيقات ياضو البيت بتشوفونا نحن زي عبيدكم ..

وخاصة نحن المسيرية الزرق .. ماشفت في الضعين بتعاملو معانا بعنصرية كيف..

التقول نحن ماعرب .. بس برضو هم احسن لينا من الجلابة .. والفلول.. بعدين القايد حمي...دتي.

ماعندو العنصرية دا ..لكن عبدالرحيم عنصري درجة أولى..

نحن قاعدين كدا في واحد جا قال ياجماعة في مشكلة تحت تعالو ..

انا وكاسترو اتدرجنا نزلنا ..

إلى اللقاء..

رواية الحنجويد

بقلم طارق اللبيب .

الحلقة 6

نزلنا تحت لقينا القايد ماسك ليهو تلات مواطنين كأنه بحقق معاهم .. وبجلد فيهم جلد نضيف .. وبعامل فيهم معاملة .. الكلب مايعاملو ليها .. داير يكسر عينهم بي أي طريقة .. ماعارف قصدو شنو ..

المهم في النهاية فهمت عايز يخليهم يقولو نحن تبع الجيش .. وقبضونا ناس الدعm

أسرى.. المهم ملاهم الكلام.. وقال ليهم تجاوبوني على اسئلتي. زي ما قلت ليكم بالنص..

قالو ليهو حاضر سعادتك ..

اتلفت علي قال لي ياضو البيت وين تلفونك الاي فون ؟..

قلت ليهو معاي ..

قال لي صور اولاد العزبة ديل ..

انا فتحت الكميرا وبديت اصور ..

بدا يسأل فيهم أسئلة سخيفة ومهينه ومزلة ..

قال ليهو نحن شنو؟ .. ماعارف نحن شنو؟ ..

قال ليهو ..جاهزيه سرعه حسم ..

قال ليهو قول انا مره؟

قال ليهو انا مره..

قال ليهو قول باااااع .. قالو باااع..

قولو الجيش عرد .. قالو ..

قال ليهو نحن اسرناكم من وين؟ ..

قال ليهو من جنب القيادة .

القايد ابتسم.. وقال ليهو وين باقي جماعتكم؟؟

قال ليهو الانضرب انضرب والشردو شردوا خلونا دخلو القيادة .. نحن خلونا ..

قال ليهو رايكم فينا شنو؟

قال ليهو والله انتو رجال.. مافيكم كلمة ..

القايد قال الله اكبر.. وكلنا قلنا الله اكبر..

قال ليه. طيب..

رسالتك شنو لاخوانك ..

قال ليهو بقول ليهم احسن ليكم تنضمو للجاهزية حراس الثورة والدمقراطيه..

اتلفت علي انا .. وبي إشارة كدا عشان أوقف التصوير ..

بعد انتهى التصوير .خبط الناس المساكين ديل كم صوت كدا..

وقال ليهم يلا عردو.. ما اشوف لي واحد فيكم حايم بجاي..

واتلفت علي انا ..

وقال لي اسمع ياضو .حول لي الفيديو ده ..على الواتساب حولتو ليهو ونشرو في الفيس والتويتر وقروبات الجاهزية والقروبات الداعمة للجيش..

واكتشفت انو برسلو الفيديوهات دي لناس بره السودان .. استخبارات في دولة خليجية معروفة داعمة لينا ..

المهم الفيديو بدل دلالة واضحة .على انو نحن انتصرنا في معركة الليلة وديل اسرانا..

والحقيقة غير كدا خالص..

بس الفيديوهات دي اغلبها بتتصور وبتترسل بره للخلايجة الداعمين القضية عشان الدعم يتواصل..

في ناس كثيرين مفكرين انو الفيديوهات دي نحن عاملنها عشان نحبط بيها الجيش .. الهدف اكبر من كدا ..

اها يازول.. انا من اليوم داك بقيت المصور المعتمد للمجموعة دي..

انا وكاسترو حضرنا الحادثة دي وطلعنا فوق .. وكاسترو يضحك.. وانا صراحة الحكاية دي حزت في نفسي.. يعني اتالمت على الناس المساكين العزل ديل ..لكن قلت يازول في سبيل القضية كلو يهون . والغاية تبرر الوسيلة ..

بعد طلعنا قلت لي كاسترو..

عليك الله ياكاسترو ..الجاهزية طوالي بعملو كدا ؟؟.. قال لي لالا بس لمن تحصل هزيمة ..وما نلقى أسرى بنجيب اي مواطنين.. ومكن نلبسهم لبس الجيش.. ونكشحهم بالتراب ونضربهم .. عشان في التصوير يظهر كأنهم كانو في معركة .. ونمليهم كلام يقولوه..

والمابقول بس طلقة واحدة.. نسفرو لي الله طقيق وقه قه قه يضحك .. غايتو كاسترو قلبو ميت . ومافي قلبو ذرة رحمة .. زي الكل ..

قلت ليهو طيب ديل المواطنين بتعاملو معاهم كدا

الأسرى كيف يكون الحال؟؟..

قال اسكت ساي .. عادي بنصفيهم .. لمن مايكون في مكان اعتقال ولا في نقص في التموين والتغذية .. طوالي تفضي فيهم الكلاش..

ولو في طريقة اعتقال بنصورهم ليك كدا الواحد نخليهو زي اخته ..

لكن والله الحق يقال يا الضو. بصراحة عساكر الجيش ديل فيهم رجال.. مابخافو من الموت ..

ياخ مرة اسرنا لينا رايد ..والله احتفلنا عديل.. دقيناهو دق العيش.. اي زول فينا ممغوس من الجيش.. ضرب الرايد ده بونيه ..

وبدينا نصور فيهو لايف .. قلنا ليهو قول باااع

قال.. انا؟؟؛ اقول باع كيف؟؟ وانا رايد؟ ..

والله قال الموت واحد. مابهين الجيش رمز البلد. عشان انا خايف الموت ..اقتلوني ..

انت عارف نحن قطعنا التصوير سريع.. لكن للأسف في جزء من التصوير اتنشر..

وزي الرائد ده كتيرين والله .. لكن نحن ثباتهم ما بننشرو بننشر الجرسه بس ..

ياخ مرة واحد في الخرطوم اسمه (جمال) .تقريبا الزول ده كوز كبير لانو رسلو ليهو ٣٠ من الجاهزية.

وهو قاعد براهو في بيتو..

قالو ده لازم الزول ده يتقبض.. او يتصفى.. لانو من مؤسسي التصنيع الحربي.. ومهندس بصنع صواريخ عديل.. والاوامر دي جاية من برة البلد .. فوق للقيادة ذاتها..

اها الجاهزية لمن وصلوه . قالو ليهو انزل استسلم..

قال ليهم .. انا شرف الجيش .. والبلد

استسلم لي لحرامية ومغتصبين .. بس بدو يضربو على النوافذ والشبابيك عشوائي..

والزول فتح فيهم النار من فوق .. الجماعة طوالي استخدمو السواتر.. وبقو يضربو فيهو وهو كان ماخد وضعية امان ..

وكل مايلقى فرصة يضرب واحد..وطلقتو في الرأس بس..في نص الجبهة مابجلي ..

اقسم بالله يا الضو الزول ده ثابت.. وبضرب قريب الخمسة ساعات .. وكل مايلقى فرصة يقنص واحد من الجاهزية .. باختصار الزول ده قتل ١٧ مننا ..

وتاني زخيرتو قطعت.. طلعو ليهو فوق.. وبرضو أبا يستلم .. صفوهو..

وزي مافي ناس في الجيش ده رجال ووطنيين كدا.. بس برضو في خونة وجبنا ومايستحقو شرف العسكرية .. كل الأماكن الفقدها الجيش..

. فقدها بسبب الخيانة في صفوف الضباط ..بحكي ليك حادثتين ..

ياخي في واحد ضابط كدا باع متحرك كامل في الباقير .. والله نحن بسببو فاجخين قريب ال٥٠ عسكري جيش... تبيع اخوانك وزمايلك عشان قروش؟؟ عليك الله ديل رجال ديل ؟؟

ياخ في واحد في جبل اولياء طيار من أنجح وانزه الطيارين.. كان بالينا بل... ومكرهنا البلد.. اليوم داك كان متواصل مع زميلو عادي ..

زميلو في قاعدة النجومي .. زميلو ده كان متفق مع قيادة الجاهزية.. بمبلغ كبير من المال بالدولار.. انو يصفيهو ..

اها الطيار قال لزميلو انا نازل في القاعدة اتزود ذخيرة .. قال ليهو اعمل هبوط ..انا راجيك الوضع امان ..

اول من نزل جاهو بالمسدس الشخصي وختاهو ليهو في راسو.. الضابط عاين لزميلو كدا.. وقال ليهو ده شنو يادفعة؟؟

قال ليهو معليش والله انت لازم تموت ..

الضابط قال ليهو اضرب.. ما دام انت خاين.. يبقى مافي داعي للحياة ..

وفعلا ضربو واعدمه في القاعدة ..

والله بدون تردد .. يازول استلم قريشاتو بهنا .. وسافر كمبالا هسي عايش في اسعد ايامو.هناك..

قلت ليهو لكن ياكاسترو.. الزول ده سمعت بيه.وبخيانة الزمالة وجابوه.في المديا ..

لكن هو اساسا مننا.. فطبيعي ينحاز للجاهزية ..

قال لي لا لا .. المفروض جيش البلد يكون فوق ل القبلية والأسرة..

لو فعلا انت وطني حقيقي..

لكن ديل الفلول عبيد القروش.

هسي جودات ودرموت ديل موش مننا د؟ ومن قبايلنا.؟ . لكن ناس وطنيين واقفين مع جيشهم بكل وطنيه .. عشان كدا حتى لو كانو ضد الجاهزية بنحترمهم ..

والله الخاين مابنحترمو حتى ولو بسببو انتصرنا.. غايتو كاسترو عندو محن عجيبة . وقصص ما بتنتهي ..

كاسترو .. انت نومتا ؟؟:لانو سكت مسافة قال لا سرحت .. وقعد على حيلو قال لي اسمع .. في عمارة قدام معتقلين فيها بنات.. بكرة بعد بكرة اخف شوية.. وبسوقك معاي .. عشان تمشي تشعر بمعنى الحياة مع بنات الجلابة ..

اقسم بالله ياجماعة انا راسي ضرب وجسمي كله نمل من الكلام ده .. بس خليكم تسمعو العجب العجاب ..

إلى اللقاءرواية الحنجويد

بقلم طارق اللبيب .

الحلقة 6

نزلنا تحت لقينا القايد ماسك ليهو تلات مواطنين كأنه بحقق بحقق معاهم .. وبجلد فيهم جلد نضيف .. وبعامل فيهم معاملة .. الكلب مايعاملو ليها .. داير يكسر عينهم بي أي طريقة .. ماعارف قصدو شنو ..

المهم في النهاية فهمت عايز يخليهم يقولو نحن تبع الجيش .. وقبضونا ناس الدعm

أسرى.. المهم ملاهم الكلام.. وقال ليهم تجاوبوني على اسئلتي. زي ما قلت ليكم بالنص..

قالو ليهو حاضر سعادتك ..

اتلفت علي قال لي ياضو البيت وين تلفونك الاي فون ؟..

قلت ليهو معاي ..

قال لي صور اولاد العزبة ديل ..

انا فتحت الكميرا وبديت اصور ..

بدا يسأل فيهم أسئلة سخيفة ومهينه ومزلة ..

قال ليهو نحن شنو؟ .. ماعارف نحن شنو؟ ..

قال ليهو ..جاهزيه سرعه حسم ..

قال ليهو قول انا مره؟

قال ليهو انا مره..

قال ليهو قول باااااع .. قالو باااع..

قولو الجيش عرد .. قالو ..

قال ليهو نحن اسرناكم من وين؟ ..

قال ليهو من جنب القيادة .

القايد ابتسم.. وقال ليهو وين باقي جماعتكم؟؟

قال ليهو الانضرب انضرب والشردو شردوا خلونا دخلو القيادة .. نحن خلونا ..

قال ليهو رايكم فينا شنو؟

قال ليهو والله انتو رجال.. مافيكم كلمة ..

القايد قال الله اكبر.. وكلنا قلنا الله اكبر..

قال ليه. طيب..

رسالتك شنو لاخوانك ..

قال ليهو بقول ليهم احسن ليكم تنضمو للجاهزية حراس الثورة والدمقراطيه..

اتلفت علي انا .. وبي إشارة كدا عشان أوقف التصوير ..

بعد انتهى التصوير .خبط الناس المساكين ديل كم صوت كدا..

وقال ليهم يلا عردو.. ما اشوف لي واحد فيكم حايم بجاي..

واتلفت علي انا ..

واكتشفت انو برسلو الفيديوهات دي لناس بره السودان .. استخبارات في دولة خليجية معروفة داعمة لينا ..

المهم الفيديو بدل دلالة واضحة .على انو نحن انتصرنا في معركة الليلة وديل اسرانا..

والحقيقة غير كدا خالص..

بس الفيديوهات دي اغلبها بتتصور وبتترسل بره للخلايجة الداعمين القضية عشان الدعم يتواصل..

في ناس كثيرين مفكرين انو الفيديوهات دي نحن عاملنها عشان نحبط بيها الجيش .. الهدف اكبر من كدا ..

اها يازول.. انا من اليوم داك بقيت المصور المعتمد للمجموعة دي..

بعد طلعنا قلت لي كاسترو..

قلت ليهو طيب ديل المواطنين بتعاملو معاهم كدا

الأسرى كيف يكون الحال؟؟..

قال اسكت ساي .. عادي بنصفيهم .. لمن مايكون في مكان اعتقال ولا في نقص في التموين والتعذية .. طوالي تفضي فيهم الكلاش..