عبقري الألحان بشير عباس
✍️كتب الرائع الطيب عبدالماجد
( هدنة )
بشير عباس
( بيتهوفن ) الحلفايا وساحر العود )
( أبقي أسأل عن قلوبنا ) …!! 💞
وكأن ( بشير عباس ) ولد ليكون ملحناً وفي فمه ( صفارة )
لتتوج الحلفاية ملكاً جديداً يضاف لمصفوفة الملوك
هذا المبدع الذي دوزن الكلمات لحناً وحلق بنا في سماء أغنيات خالدات …!!
فكان ( بشير عباس ) الموهبة العبقرية والعطاء الثر
والألحان البتشبهو
أبوهو أهدي ليهو ( ناي ) من الأبنوس في بواكير عمره
الأولى لانة أحس وعرف أن أبنه يريد ان يقول شيئًا ….!!وهو لا يدري أنه أهدانا بشير
وأعطني ( الناي ) وغني …!
لم يكن ( بشير عباس) ملحناً عابر وفناناً محدود
لقد كان دفقاً من المشاعر والإحساس ترجمها الي أغنيات ستظل باقية فينا ولن تزول ….
( ونسيتني أنا وخلاص يعني مافي طريق يرجعني ) ….!!
ثنائيته مع البلابل تُدرّس …
وقد ظهرن في وقت عز فيه الظهور
وكن على موعد مع التاريخ …
وضعه القدر في طريق ( البلابل ) فأبحر معهن الى الضفة الأخرى من النهر عبر مجموعة من الألحان لايقدر عليها إلا هذا ( الماهر )
ياخ دا لحن ( رجعنالك ) 😳
زول بلحن ( رجعنالك ) بهذا الجمال والتنوع أكيد استثنائي وقد كان بشير كذلك …!!
الأغنية ذاتا ( عجيبة ) أغدق فيها ( سبدرات )
و( عام ) في ( بحر أبيض ) مرق بي غادي ….
ويومنا أبيض
وبشير عباس ( لحنا ) بالمسطرة
🎼
ورجـعـنـالـك وجـينـا غـفـرنا إنك
بالوشـاية فـصـدت كبـد الـفـرحة فـينـا
رجـعـنـالـك وعـينـينا الـبكـت فـجعـت رموشا
دمـوع سـخـينـة
وبي فرح عـودتـنا رفـت زغـردت كلـمات حـنـيـنـة
السياسة قد تدخلك البرلمان …رجعنالك دي دخلتك السودان يا ( سبدرات ) ….أوا هنآك أجمل 🌹
البلابل ذاتن طارن بيها فوق حدود المسموح
وتسامت الروح …!!
أثرن الشجون ونكأن الجروح
وروعاتك يا ( عبس )
ورجـعـنـالـك عـشـان انـت الـجـرف الـفـيـهو شــتلات حـنـة لي فرح الـقـبـيـلـة
( لاهو رجع ..ولا نحن رجعنا ….!!
لا القبيلة فرحت يا سبدرات ) …🥲
( بشير عباس ) ( مجذوب ألحان )وكأنه يستلهمها
كل لحن يختلف عن الآخر مليان شوق ومعطونة بينا ..😍
لذلك يجعلك مأخوذ إلى ضفافه
, وكان اللقاء الراقي مع ساحر ( حي العرب )
( سيف الدين الدسوقي ) في ( مشوار ) …
هذه الأغنية( المبهرة )
فحلقت البلابل بجناحي الدسوقي وبشير هذه المره في رحلة الي المريخ …
🎼
وبتعرف إني من أجلك مشيت مشوار سنين وسنين
مشيت في الليل إلى الغربة على الكلمات ودمع العين
وعشتك لما فارقتك حروف تتغنى بيك حنين
بتعرف؟ ؟؟؟
إنت ما بتعرف ….!!! ؟؟؟
أنحنا بي حبكم هايمين ….🥰
( عليك الله شوف الناس دي كانت بتغني في شنو ) ..!!
ودارت دورة الأيام ونحن مع الزمن أغراب
ليستدير ( بشير عباس ) في ( إللي بسأل ﻣﺎ ﺑﺘﻮه ) ... للرقيق ( حلنقي ) وإنت ﻣﺎ ﻣﺠﺒﻮﺭ ﻋﻠﻴﻨﺎ ﻧﺤﻦ ﻣﺠﺒﻮﺭﻳﻦ ﻋﻠﻴﻚ ...
ليؤكد علو كعبه في تلحين هذه الأغنية
لعّب هادية في النص وحياة وآمال في الأطراف استلام وتموين
🎼
ومرة شفناك يا الحنيّن طالي في حارتنا صدفه
لسه منتظرين تجينا .. ناسي طالبنك زيارة) ..!!؟
يا جمال فرحة مشاتل الصباح حاضن نضاره
ومع اكتمال الهجمة بنتقل من القرار للجواب
وبضرب فوق ….والبلابل ضاغطات
وينتقل بشير الي ليفل ( الوحش )
منتقلا الي مربع موسيقي أعلى …والبلابل مشن فوق
🎼
ولو سألت علينا كنت عرفت نحن الليله وين
وكنت أول لما نحن نغيب ثواني تقول سنين
يرجع تاني ( عباس ) (يختها واطا ) ويهدِي اللعب ويمتع الجمهور …
🎼
وﻏﻴﺮﻭﻙ ﻳﺎ ﻭﺣﻴﺪﻧﺎ ؟ ﻭﻻ ﺻﺎﺑﺖ ﺭﻳﺪﻧﺎ ﻋﻴﻦ ...
اشتهينا تكون معانا ما لقينا حنان عينيك
إنت ﻣﺎ ﻣﺠﺒﻮﺭ ﻋﻠﻴﻨﺎ ﻧﺤﻦ ﻣﺠﺒﻮﺭﻳﻦ ﻋﻠﻴﻚ ...
البلابل ( استغفرن ) …و( بشير ) تسامى
ونحن متابعين ( مباشر )
( دي دايره استوديو تحليلي )
ليلتقي ( الحلنقي ) والبلابل من جديد و في أعلى الشجره هذه المرة وفي عشة صغيرة …
إتخيل ( العصفور والبلابل )
( إلا نطير ) ..!!
سمح لهم بشير بالهبوط ….عملوا landing
فربطنا الأحزمة
واقلعنا من جديد في الرحلة المتجهة إلى القمر
🎼
وعشة صغيرة نفرشا ليك برموش عينينا
واستطاع ( بشير عباس ) وبما منحه من لحن آسر
وزاهي لهذه الأغنية أن يجعل من هذه العشة الصغيره
فضاءاً رحيب يسع الجميع …فدخلنا آمنين
أعمل فيها ( عودَه ) 🎼 فأزهر ( عودَها )
بلحن مخملي فأخرجت ثمارها زوجاً بهيج
ليعود بشير مع البلابل عبر لحن راقص في أغنيه رشيقة
بحلاوة حلنقي ولون المنقة …و يا الشايل المنقة
و ( الحلنقي ) قادر على تحويل ( الدوم ) إلى كائن رقيق
دعك من المنقة ….!!
وبشير ضوّقنا ليها …
ليرسل الجنرال ( جعفر فضل المولى ) في بريد البلابل
أغنيات نضرة ويوقع ( بشير ) بريشته الساحرة
وكانت ( متعالى علينا ) ….!!
إرتقى فيها الرجل والبلابل طارن
🎼
ومتعالي علينا وعنادو يزيد
ما سائل فينا ولا بالتسهيد
وجعفر فضل المولي هو من قدم البلابل لبشير
وبشوقنا الطّول
لو ليهو اتحول
ما كان إتمادى بالتأكيد
ولا خلى قلوبنا نيرانو تزيد
لتلتقي البلابل مع المترف ( صلاح حاج سعيد )
في ( شارع بيتنا )
أضاءه ( بشير ) ( ولع السودان كلو ) 💡💡💡💡💡
في أغنية تتقطر فرح وتتناثر زهور ويا الهليت فرحت قلوبنا 🥰
وإذا زار احدهم حبيب أو ( جابو الدرِب )
يتراقص هذه اللحن المشحون في مخيلته فينتشي ويربو وكنا فرشنا السكة ورود لو كلمتنا كان بالجية
البلابل مبدعات وبشير ملهم …
وسايقا ( صلاح )
وخطوة عزيزة ويوم موعود الخلاك تطرانا شوية
.
. ولأن ( بشير ) متفرد كان لابد ان يلتقي بالحنين ( التجاني حاج موسي ) و ( البلابل ) في أغنية لايقدر عليه إلا بشير عباس ….
وخصامكم لما زاد طوّل...
ولمن إنتو فى الأول جرحتونا ...
ساقا ب ( القيّف) و ( تا تاها ) شويه شويه …
ولأن جرعتها عاليه
أدانا ليها ب ( الدرِب ) 🩺فسرت فينا مسري الدم وكانت
متلازمة العتاب والحب والندم
لحنا ( بتهوفن ) الحلفايا بالكتلوج
و ( بنات طلسم ) ( إتجدعن ) فيها …!!
فرد السودانيون التحيه بأحسن منها وحكموا عليهم بالحب 💞 مع سبق الاصرار و ( التصنت ) …!!
قلنا أقـلو نتلاقى ...
تعاتبونا وتلومنا وفى الآخر تصالحونا ...
( تاتي بتجي )
تغلطو إنتو ونسامح وما بنقدر نخاصمكم ...!!
أهدانا المختلف ( عثمان خالد ) ( سلافة الفن )
وقدم لنا ولهن ( طير الجنة )
ويبدو أن ( بشير لحنها ) من هناك
وارتقت ( البلابل )
وكلما أردنا أن نرسل الأشواق نستدعي هذه اللحن الآسر
ويا حنيّن يا طير الجنه
يا مرسال شوقنا لأهلنا
طير بالأشواق رك في الحنه
قول للبنريدهم طولنا
( طولنا والله ) ..
وما أحوجنا لطائرك يا ( خالد ) وهو يتهادى مع
( البلبلات ) ويتداعى مع ( بشير عباس )
🎼
وبالشوق يا طير زور حارتنا
قول ليه عيونك ضوت واحتنا
غرد يا طير يا طير بغناوينا
ردد أنغام حلوه حنينه
يا حلاوة الليل بسواقينا 😍
( اللهم ردنا سالمين ) 🙏
نشوف بلداً حُنان اهلا ترسى هناك ترسينا
كان ( بشير عياس ) أيقونة لحنية باهرة وإحساس متدفق في التلحين والتأليف الموسيقي
و( عواد ) من طراز نادر ( بعذبو عذاب ) ولو مالقي أي حاجه ( بصفِر ) 🥰
قدم مقطوعات موسيقيه خالدة وكانت
( القمر في كنانه ) لوحةُ تمشي على قدمين
لحّن ( بشير ) لآخرين
وتبقي كنوز محبة ( كوم براها ) …!!
التقى فيها بزيدان ..فكان لقاء ( العود ) والريحان )
في أغنية من كوكب اخر ….
🎼
ولما تشتاق للمشاعر
تملا دنياك بعبيرا
ولما تشتاق للعواطف
تنسجم تلبس حريرا
ابقي اسأل …🙏
سألنا يا زيدان ….قالو إنتا. ….🥰
وإذا لم يكتب ( بشير عبد الماجد ) غيرها لغمرته محبتنا
وبشير عباس تجلى ….
( ولما تقسو عليك ليالي الوحدة والليل يبقى ليل )
( ماعصرتو علينا ) …!!
وكابلي حظي بلحن نادر من بشير عباس حيث لحّن له ( طائر الهوى ) وكابلي عجبو قاسي
بس ( بشير ) ( خط أخضر )
وطائرُ الهوى جنَاحُه مَاله !؟ راشهُ الْنّوى أم الْجّوى غَاله !؟ فؤادهُ نغْم صُويدِحٌ غيداق قد مَاج و اضْطرم
( بشير بالغ )
وكان لقاء ( عباس ) باذخاً مع ( عبد العزيز )
وبلادي ياسنا الفجر وينبوع الشذي العطر
حيث لحنها ب ( مزمار داوود ) وكانت أحلام وطن وآياتٍ من الشعر
لكن البلابل استأثرن بالزبدة ….ورفقاً بالقوارير …!!
وكانت قصة ريد ومشوار حب وردة ومحنّة .. وموجة عبير …!!
وعشتك لما فارقتك حروف تتغنى بيك حنين
بتعرف؟ ؟؟؟
إنت ما بتعرف ….!!!
أنحنا بي حبكم هايمين
صحي يا بشير …!!؟؟
تعليقات
إرسال تعليق