الشيخ الحويني رحمه الله

 

هو مين الشيخ (أبو إسحاق الحويني) اللي توفى أول امبارح؟

وليه الناس كلها بتحبه بالشكل دا؟

وعمل إيه في حياته؟

واتوفى ازاي؟

ومسيرته العلمية عبارة عن إيه؟

خليني أقول لك يا صديقي إن علماء الإسلام كتير جدًا حول العالم، فيه منهم المؤثر وقدر يظهر ويبرز، ومنهم اللي علمه اقتصر على اللي حواليه.

ربنا بيديك عمر، وإنتَ بتختار تفني العمر دا في إيه، فلما تدور هتلاقي إن فيه مشايخ وعلماء كتير أفنوا عمرهم كله حرفيًا في التعلم والدعوة والعلم، علماء أجلاء سابوا تراث كبير قبل رحيلهم، ومن ضمن العلماء دول (أبو إسحاق الحويني)، أو اسمه الحقيقي (حجازي محمد يوسف شريف).

وعلشان نعرف مين هو الشيخ (حجازي)، وليه الناس بتقول له يا (أبو إسحاق)، تعالى ناخد الموضوع من بدايته، من يوم ولادته، ونشوف العلم اللي وصل له.

جاهز؟

يلا بينا.

(حجازي بن محمد بن يوسف بن شريف)، أو (أبو إسحاق الحويني)، شيخ مصري أشهر ما ظهر له هو برنامجه الأسبوعي في قناة الناس بعنوان فضفضة، اللي كان له أثر كبير جدًا في نفوس الناس، وكمان له برنامج في قناة الرحمة، وقناة الندى اللي أشرف على تشغيلها.

من خلال القنوات الجميلة دي، اللي سابت أثر كبير في نفوس المصريين من الناحية الدينية، قدر (أبو إسحاق) يوصل لكل بيت مصري، بكلامه الفصيح الجميل البسيط السهل في تفسير كتاب الله والتحدث عن الأثر الإسلامي وأحاديث النبي -صلى الله عليه وسلم- والصحابة.

سنة 1956 اتولد (حجازي) في قرية حوين بمحافظة كفر الشيخ في مصر، ونشأ فيها، ووالده سماه (حجازي) لأنه خلفه بعد ما رجع من أداء فريضة الحج من بلاد الحجاز.

وسبب تسمية الناس ليه فيما بعد بالـ(حويني) علشان القرية اللي اتولد فيها، قرية حوين.

كبر في أسرة متوسطة الحال بتشتغل في الزراعة، واتنقل بين قرى كفر الشيخ أيام دراسته الإبتدائية لحد السنة الأخيرة من الثانوية العامة، وبعدين سافر للقاهرة علشان يقعد مع أخوه ويلتحق بالجامعة، وهنا بدأ يهتم بحضور محاضرات الشيخ (عبد الحميد كشك) الله يرحمه، واتأثر بيه جدًا خصوصًا بطريقة إلقاءُه وعلمه.

بيدخل الشيخ (الحويني) جامعة عين شمس، وبيلتحق بكلية الألسن قسم اللغة الإسبانية.

في الوقت دا بدأ يقرأ كتاب الشيخ (محمد ناصر الدين الألباني) "السلسلة الضعيفة"، فضل يدرس فيها سنتين، بيقول (الحويني) إن السنتين دول ربنا مَن عليه بأعظم فائدة بسبب السلسلة دي، أعظم من كل سنين الدراسة والعلم اللي درسها في حياته.

ورغم إنه كان بالنهار بيشتغل في بقالة صغيرة علشان يسد مصاريفه، وبالليل كان بيقرأ في كتب الشيخ (الألباني)، إلا إنه كان الأول في كليته في اللغة الإسبانية.

فضل (الحويني) الأول كل سنة على زملائه، لحد السنة الأخيرة، واتخرج بترتيب عام امتياز، وحصل على بعثة دراسية لاستكمال تعليمه في إسبانيا، ولما سافر إسبانيا وبدأ يكمل تعليمه هناك، مقدرش يعيش في إسبانيا وقرر إنه هيرجع ويرفض المنحة، وفعلًا مكملش ورجع مصر.

لما بدأ يتوغل في العلم الإسلامي، اتعلق بـ(ابن حجر)، فالناس بدأت تناديه وتقول له يا (أبو الفضل)، وبعدين اتعلق أكتر بكتب (أبو إسحاق الشاطبي)، ومن هنا بدأت الناس تقول له يا (أبو إسحاق)، وسبب تعلقه بكتب (أبو إسحاق) لأنه عرف إنها للصحابي (سعد بن أبي وقاص)، ولما عرفوا إنه من قرية حوين بقوا يقولوا له يا (أبو إسحاق الحويني)، ومن هنا جت التسمية.

الشيخ (الحويني) أشهر شيخ سلفي في مصر تقريبًا، وأدى دروس ومُحاضرات كتير في مساجد كتير في محافظات مختلفة، ومنها محاضرات في مسجد شيخ الإسلام اللي في محافظة كفر الشيخ.

ظهوره في القنواة الفضائية في أول الألفية خلاه واحد من أهم وأشهر الشيوخ اللي بيدخلوا كل بيت مصري ويسيبوا أثر ديني قوي.

(الحويني) شيخ سلفي منتمي للسلفية العلمية، ودي مدرسة دينية بتركز بس على التدريس ونقل علوم الحديث والتفسير، وبعيدة تمامًا عن العمل السياسي أو الجهادي.

آخر أيامه في مصر كان بيدرس على إيد الشيخ (محمد نجيب المُطيعي)، وبعدين سافر للسودان وبعدها للسعودية، وبعدين للأردن، وهناك قابل الشيخ (الألباني) وفضل معاه شهر، سأله فيها حوالي 200 سؤال في علل الحديث، وسأله في علوم كتير جدًا في الشريعة وحكم البرلمانات المعاصرة والأحزاب. والمناقشات دي أثرت فيه جدًا وكونت فيه عقل عالم كبير.

بعدها رجع السعودية، وقابل شيوخ وعلماء كتير وكان بيتردد على المساجد والمجالس العلمية اللي بيعملها الشيوخ والعلماء

(الحويني) من وهو صغير وهو قارئ نهم للغة العربية، وكان بيقرأ روايات وقصص أدبية، وبعدين بدأ يقرأ الشعر، وكان بيكتب كمان الشعر، واتعلم أساسيات اللغة العربية كاملة وأتقنها.

اللي حببه في القرآن في بداية حياته خاله (عبد الحي زيان) اللي كان متقن للقراءات كلها، واتعلم منه القراءات، وبعدها بدأ يتعلم الأحاديث وكتب السنة.

الشيخ (الحويني) قابل في حياته شيوخ وعلماء كتير جدًا أثروا في حياته وكل عالم خد منه الجزء اللي فاضل له.

خاله (عبد الحي زيان) خد منه القرآن والقراءات وتجويده.

الشيخ (محمد ناصر الدين الألباني) اللي ساب أثر كبير جدًا فيه وتتلمذ على إيده.

الشيخ (عبد الحميد كشك) اتأثر بعلمه وطريقة إلقاءُه للخطب.

الشيخ (عبد العزيز بن باز) كان شيخ بمدينة جدة بالسعودية وكان بيحضر له دروسه كلها وبيتعلم منه.

(محمد بن صالح العثيمين) كان بيحضر دروسه بالمسجد الحرام.

(عبد الله بن قعود) فهم منه شرح كتاب "البرهان في أصول الفقه" لإمام الحرمين (الجويني).

(محمد نجيب المُطيعي) خد منه أصول الفقه وأصول علم الحديث وكمان جزء كبير من صحيح البخاري وكتب تانية.

(عبد الفتاح الجـ* ـزار) خد منه اللغة العربية. اللي لما (الحويني) اتشهر واتعرف لما كان بيشوفه كان بيجري عليه ويقدمه للناس ويخليه يُلقي كلمة.

دا غير جامع الأزهر اللي تتلمذ فيه على إيد علماء وأساتذة في العلوم الشرعية المختلفة.

وجمع علمه كله من علماء كتير قابلهم في مصر والبلدان اللي سافرها وكان مهتم جدًا بالعلم.

الشيخ (الحويني) علماء كتير جدًا أجلاء أثنوا عليه وقالوا في حقه كلام عظيم وجميل، لدرجة إن فيه ناس كانت بتروح لعلماء في بلادهم وتسألهم أطلب العلم من مين في مصر، كان الرد من (أبي إسحاق الحويني).

حتى إن الشيخ (أحمد النقيب) قال عنه: "الشيخ أبو إسحاق في جملة واحدة: يعيش بالدين، وللدين، وفي الدين، وليس له همٌ إلا الدين".

وفوق كل دا، عامة الناس اللي كانوا بيسمعوا له أو يشغلوا له حلقة في أي برنامج ويتشدوا وينجذبوا بقلبهم وبعدين عقلهم ويحبوه.

زيادة على البرامج الدينية، والخطب اللي عملها في مساجد كتير، والدروس الدينية اللي ملهاش عدد، ساب كمان (أبو إسحاق الحويني) عدد من الكتب والمؤلفات الدينية كتير جدًا فيها علم غزير ولها أثر كبير.

وفي النهاية، توفاه الله في رمضان، شهر الغفران، امبارح، يوم الاثنين 17 رمضان.

17 مارس 2025 بيتوفى الشيخ (أبو إسحاق الحويني) في دولة قطر عن عمر 68 سنة من العلم وتصدير العلم وترك الأثر.

اللي حصل إن الشيخ (الحويني) حصل له أزمة صحية خطيرة في آخر أيامه، واتنقل للمستشفى، والأطباء حاولوا يتدخلوا وينقذوه، ولكن حالته تدهورت بسرعة، وتوفاه الله في أفضل شهر في السنة.

الله يرحمه، ويجعل الأثر اللي سابه شفيعًا له.

-

وبكدا مقالنا يكون خلص، متنساش الشير في الخير، مجهود اتبذل علشانك متبخلش في إن غيرك يعرفه.

    ✍️للكاتب #محمد_صاوي