قصة واقعية حدثت، فضل الصلاة النارية

 *🌹قصة جاري والصلاة النارية،،*

غاب جاري في الحله كم يوم،، وعندما عاد سالته، خير ان شاء الله مالك اختفيت،،

قال لي دي قصة عجيبة حدثت لي، قلت له خير،

قال لي أمس الأول توفيت خالتي في مدينة المهندسين (وهوساكن أمبدة)، ما لقيت وسيلة الا وقف لي بتاع توكتك، وفي صينية المنصوره وقفنا ارتكاز النهب السريع،، قالو لينا ماشين وين،، قلنا ليهم المهندسين،، قالوا بس ناس المهندسين ديل كيزان ونحن دايرنهم، ركبوا معانا خمسه دعامه وهم مبسوطين كأنهم غنموا غنيمة كبيرة وفي الطريق للنقطة التي مستولين عليها وهي في مدينة البستان، نزلونا جوه القسم  وشالو مننا الجوال،، جوالي كان ربيكة صغير عادي فتحه وقلبه كدا لقى فيه اسم البرهان وكباشي،، الزول من ما  لقى الاسماء دي في الجوال  كأنه لقى كنز سمين جرى جرى  للضابط وراه الجوال وقال ليهو الزول ده بتصل بالبرهان،، قلت ليهو برهان ياتو يا زول ده اخوي،، قال للضابط وكمان بتصل بالكباشي،، قلت ليهو يازول ده ود عمي،، انا قايل الضابط يطلع عاقل ويكون أعقل من العسكري لكن  من كلامه لقيته مافاهم اي حاجه،، الناس دي جات من وين وكيف؟؟؟؟!!!! 

الناس دي ضربوني ضرب شديد في ضهري ووشي،،

الضابط مشى مكتبه، وخلانا للعسكري شتيمة وضرب،،

قعدنا معاهم ساعتين،، لمن فتروا مننا  قعدوا وكل مرة بجيبوا ناس جداد، يضربوهم ويهنوهم إهانة شديدة 

اها انا في اللحظة دي بدية الصلاة النارية، وأنا متيقن منها،، والله لمن وصل العدد عشيرين جاني ضابط تاني  وقال لي  انت مالك هنا ، قلت له الحاصل كده كده،، والأسماء الموجوده في الجوال ديل اخواني ماعندي علاقه بالبرهان، قال وين الجوال قلت له مع العسكري في هذه اللحظه العسكري كان واقف خلفي، قال له هذا هو جواله،، اداني ليهو وقال امشي بدون ما يقول لي اي حاجه،، 

الصلاة النارية بتفك الكرب،،

الصلاة على النبي صل الله عليه وسلم تنحل بها العقد و الكرب وتتحقق به الحوائج،

 اليس الله عزوجل وملائكته صلوا عليه وسلموا تسليما وامرنا بها،،

صل الله وسلم وبارك على سيدنا محمد وعلى آله وصحبه وسلم تسليما كثيرا ماذكره الذاكرون وعدد ما غفل عن ذكره الغافلون إلى يوم الدين،،

              صيغة الصلاة النارية

  «اللَّهُمَّ صلّ صلاةً كاملةً وسلّمْ سلامًا تامًا على نبىٍ تنحلُ به العقدُ وتنفرجُ به الكُرَبُ وتُقْضَى به الحوائجُ وتُنَالُ به الرغائبُ وَحسنُ الخَوَاتِيم ويُستسقى الغمامُ بوجههِ الكريمِ وعلى آلهِ»، 

            🌹🌹🌹🌻🌹🌹🌹