يوميات علوب
يوميات علوب
✍️الطيب عبد الماجد
( ما بنسى ليلة كنا قاعدين في( حجر )
طبعا عمك ( الزين ) دا أقدم زول في حلتنا دي دون منازع
لأنو أماتنا عادي مرات يقولن ليك يوم حصل شنو كدا ما عارف والوكت داك الزين دا كبيييير ….!!
معناتا الزول دا دفعة ( آمون رع ) 😂😂
المهم ربنا يديهو العافية ما داير أقول في كامل لياقته
لكن قياساً على عمره ( أصلي ) ما شاءلله
لاقيتو قبل كم يوم كدا قاااعد في الكرسي قدام الباب
راديهو جنبو 📻وتاكلين العصاية والعراقي
وهو قاعد مع بتو أصلاً إسمها ( سعاد ) متزوجها مفتش في الصحة إسمو ( الخير ) زول طيب كدا وبنعرفم شديد زمن طويل في الحلة دي وعمك دا ذاتو بعرفني كويس
مرات بقول لي ( عنوب ) ماعارف دي نون ( النسية ) ولا شنو …!!
المهم سلمت عليهو
قال لي إنت منو …!!؟؟
( بكون سلك ( الكويل ) فصل )
قلنا ليهو أنا علوب …. علوب ياعم الزين
قال لي ( عنوب ) منو …!؟؟😳
( معناها قطع بنزين )
قلت أغير الموجه دي لحدي ما يشحن ….!!
قلت لي إنت كيفك …!!؟
فاجئتني الإجابة…
قال لي هو فضل فيها كيف….!! الكهربا قاطعة من أمبارح
قلت لي إنت الكهربا بتعمل بيها شنو …؟؟
قال كيفن كمان ….أنا دواي مو في التلاجه …..!!؟
( خجلت من روحي دي والله ) 🙈
قلت أقعد معاهو شوية رغم إني كنت ماشي مشوار لكن حسيت بيهو داير يتكلم مع أي زول …
إتكيف شديد ..طوالي تكلتا في ( حجر ) جنبو كدا
قلت ليهو إنتو هسا زمان عندكم كهربا ……!!؟؟
قال لي ما عندنا…..إلا ما بنمرض …!!
( صفعني من جديد )
وأنا عامل فيها الود خلاص محاور
ناس ( الزين ) ديل بلعبو في النهائي طوالي …
قلت أسوقو لي حتات تانيه أطلعوا من ( الجو ) دا
قلت ليهو هسا إنتو ياعم ( الزين ) زمان عندكم حفلات ….!؟؟
زولك لما اتصلح في قعدتو ….ووشو دا اتغير …!!😊
( السودانيين ديل بحبو الفرح والله ……إلا الظروف )😥
قال لي …..هيييييي ها
حفلات ..!؟؟؟
نحن ناس الحفلات
هي حفلات نصاح …أول حاجه العرس أسبوع….
( ذكرني أسبوع المرور ) ….🚦
قال لي والله ياولدي نحن لما يجي اليوم السابع دا بنكون
ماقادرين نقيف من اللعب والغنا …!!
( الوقت داك ( اينشتاين ) مشغول بالنظرية النسبية )
😂😂
قلت لي بتسوو شنو يعني ….!!؟؟
قال لي أولن بالتبادي العريس دا ما بنفارقو دقيقة
عارفنو تاني ما بتلقي …
( أتاري القصة دي من زمان ) ….!!🤔
قال لي وكل يوم حفلة ….!!
إذن ديل ياهم الاكتشفو ( القيدومات )
التقول اكتشفو لقاح الجدري
( أعمامك ديل بكونو اول إصدار للمكنات )
….
قلت ليهو وكان عندكم فنانين معروفين كدا …!؟؟
قال لي حلتنا دي بس فيها تلاتة … إلا المعروف شديد واحد من حله فوق بقولولو ( ود الصعيد ) …!!
( دا بكون ( فرفور ) حقهم ) 😂
قلت ليهو أها و ( الجكس ) كيف ..!! ؟
بحضر معاكم ….!!؟
قال لي ( الجكس ) دا شنو …!؟؟؟
قلت ليهو الجكس الجكس يعني….. البنات …الحريم
عمك تاني استعدل …قال لي ماك ممسوخ
إنت قايلن زي بنات الزمن دا …نحن بنكون برانا وهن بي رقيصن مع العروس بي هنآك
يوم الدخله بندخل مع العريس ( نهز ) فيهن ✊ونطلع
قلت ليهو أبوصلاح قال
من سهــامك تتراشحى............... وزاحمي كشحك اكشحي
خلقه عرقِك ارشحي ..........والنســيم بالطيــب كشحي
قلت ليهو امانتن في ذمتك هسا دا كلام زول ( هزا ) ومرق ….!!
قال لي دا بكون انكشح جوه 😂😂😂
ضحكنا ضحك ..😂😂😂
(الزين يا مكنة )
لينتشي الرجل ويشوت من خارج الخط قال لي ( أبوصلاح ) دا كلامو برا .. وحلق الحاج …وشغل المنشات …والوصف باليدين ….🤌 وقال كدا انداح
للقلوب شرّاح
مبتعد شيء عجيب ،
مسجون وعندو سَرَاح
بيّ ضاق الكون ،
لا أجدلو بَرَاح
منّي فارق ، وشال
نوم عيوني ورَاح
( بهرتني الذاكرة )
قال لي شوف جنس النضم دا …👌ياسلام 👏
قلت ليهو دا لو حضر معاهن فاصل كان هو ذاتو راح
قلت ليهو ( أشدا ) واحده كانت عندكم منو …!!؟؟
قال لي كيفن يعني ..؟؟؟
( أنا طبعا بنسي إني بتكلم مع عمك دا )
…😂😂
قلت ليهو يعني أجمل واحده ….!!؟؟
قعد يتلفت وضحك من قلبو وحسيت بيهو سرح
كدا ..وجاوب دون تفكير
قال لي ( الزلال ) ….!!
( أبو الزفت …..الزلال دي بتكون نار منقد …) 🔥🔥🔥
قلت ليهو أها كيف يعني… مالا …!؟؟؟
قال لي يميل حالك …
( الزلال ) دي وكت تمرق كدا ونشوفا زي التكنو
العيد ….قمر السبوع الهلا …..المفدعة ام شلاخ ….
وضامرة وديسا كابي …..
( عمك جاب من جوه )
( اتاري مكسر راقد واطا )
انا ذاتي اتكيفتا …!!
قلت ليها ما عرستها مالك ….!!؟؟
وطى صوتو كدا …قال لي أنا نان ( المحريب ) بخليني
قلتا ليهو ( المحريب ) دا منو …!!؟؟
قال أخو ( رقية ) مرتي دي …عرستها إكراماً لي خوتي معاهو …..!
الا والله يا ( عنوب ) 😂 ربنا أكرمني بي مرا كان سجدت طول عمري دا شكر ما بكفيها …!!
( رقية ) العفيفة النضيفة ست النسوان لا حدهن لا هملتني ولا قصرت فيني …!!
قلت لي دي الحاله ما هملتك ..تتذكر في الزلال ….😂
قال لي ياولدي السماحة ما كل شي …سمحة الروح
السماحة بتروح …إلا الروح وين تروح ….!!
( إستوقفني هذا التوصيف البديع )
…
تاني رجعت ل ( الزلال ) قلت ليهو العرسا منو …!؟؟
مغترب .؟؟ 😂😂
قال لي (الزلازل ) ماعرست طول حياتها الله يرحما
دي لعنة السمحات أي زول خايف يتقدم ليها
عندها ود عماً ليهاسجمان كدا إسمو ( فزع )
ما تسمع الإسم دا …زولاً مرمد كدا قال دايرا …..
إلا هي أبتو ….!!
اليوم داك ضبحنا من الفرح
قلت ليهو والله مافي زول غيركم ( كجاها ) …!!
قال لي قلت شنو …؟؟
قلت ليها عزاها…..عزاها …
مايقوم علي بي عصايتو دي كمان 😂😂
قال لي مالك علينا الليله ذكرتنا زمناً سمح …..!!!
فجأة كدا مسح عيونو بي طرف كمو عيونو رقرقن
قلت ليهو مالك …!؟؟
قال لي اتذكرت ( رقية )…!!😰
قال لي مره عييت جاتني حمى كعبة شديد
( رقية ) دي تبل التوب في نقاع الزير وتنزل في الحمي
ما نامت للصباح ….!!
الله يرحمك ويحسن إليك يا السمحة الرزينة
( والرزينات لا يغيرن هي بتعلمن الرزانة )
قال لي هسا بتي سعاد دي زي أمها حنييينة ما مقصرا فيني عافي منها ورضيان عليها…..!!
( تأملت هذا الوفاء ) …….!!
بختك يا سعاد
……!!
قلت أطلعوا من (الجو ) دا تاني قلت ليهو هسا يا عم الزين
بلدنا دي ماشة على وين …!!؟؟
قال لي هى ماشة …!!!؟
( نسفو يا حكم ) 💥
غايتو جنس ( فضيحة )عمك الزين عندو خبر وهو راقد في سريرو ….!!
الزول دا من الأوضة للكرسي البره دا الحالة لاشاف سوق لا مواصلات ….لا تسعة طويلة …!!
ولاهناي داك …!!
قلت اختبرو مواكب ولا لا قلت ليهو بتعرف الماسك البلد هسا ….!!
قال اي هم كتار ياتو فيهم ….!!؟؟
( أداني الضربة التالتة )
في اللحظة دي عمك ( الخير ) جا من بره داخل البيت
سلم علينا واطمن على ( الزين )
قال ليهو ( أبوي ) الزين كيفنك ….😍
بهذا العلو عرفت إنو ( الخير ) دا راجل بركة والله ….
قلنا ليهو كويسين
الخير بشاغل فيني وهو داخل قال لي الحلاقة عاملة شغل
نعيمًا….
قلت لي كلك ذوق ياخ )
(مشاعر ) قالت لي ظهرت اضنينك..
عشان ما جبتا ليها رصيد……..
عمك الزين قال لي سعاد بتي دا الله أداها قدر نيتها
( سعاد ) دي وحدانية لاعندها أخو لا أخت وبت فاضلة
برتني والله ….والله أكرما بي راجلاً فاضل ياهو ( الخير ) دا البنات بركة ورزق …!!🥰
( تذكرت الطيبين للطيبات )
…!!
قلت اشاغلو شوية قلت لي ما تجي نعرس ليك ……!!
ضحك ضحك قال لي دي منو المجنونة البترضى بي
لوري التراب المقلوب دا …!!
قلت ليهو اي والله شغال يا حاج ….نوديك الصالون بتاع الزلط دا نزبطك ونجيهك يمين النسوان ديل يقيفن صف ….!!
يضحك ساااي قال لي ماك ممسوخ انت ..
باقيلك النسوان ديل كلهن انا ببدلن بي طرحة
( رقية ) ….!! 🥰🔥🌹😍
( اوووووو عمك طلع في الخماسي ) 🎼
أسرني الرجل هذه المره حد الجمال …!!
أنا سمعت بالوفاء والحب والشوق والريد
بس الليلة ….شفتو عدييييل
الله يديك العافية ياعم ( الزين ) أتاريك شايل دا كلو
وقاعد …لقد صنعت يومي يارجل
ودعته على أمل لقاء …
وقلت ليهو بالجد اديتني الكتير و ( بستو ) في راسو دا 😘
وانا قايم كدا قلت ليهو …
الزلال كييييف ….!؟؟؟😍😄
قام على حيلو وطقاني بي عصايتو في نص ضهري
وميت من الضحك 😂
وانا جاري فجأة كدا مسك ضهرو
أنا قلت إمكن حصلت ليهو حاجه رجعت ليهو تاني
( طلع كمين ) تاني اداني محطه بالعصاية 😂😂😂
( عمك دا شكلو كان ( مكنة ) كبيره زمان ) 😂😂🌹
وضحكنا ضحك طفلين معا…..!!
وسبقنا ….!🥰
ربنا يسعدك ياعم الزين …….في الدارين
ويديك لمن يرضيك ….!! يا سمح يازين …؟؟
وعقبال دار الزين …..!!
والزلال يا نار الضلع 🔥😂
🌹🌹🌹🌻🌹🌹🌹
تعليقات
إرسال تعليق